2014 聖誕出遊

轉眼間已經踏入2015年啦~
2014年Jim家總算過得平安快樂，
祝願新既一年大家都平安喜樂、健康幸福!!

因為自10月開始就忙過不停，
足足有成兩個半月無出遊啦~
到左12月尾聖誕節當然要拋開一切，
與摯愛親朋去秘密花園一齊歡渡啦!!!

幾日假期總算唔係10度以下，
但西貢都幾大風，其中一日仲落左成日雨。



不過唔緊要啦，少爺有得自由行我跟尾就已經係最好既節目啦~



少爺仲好似鍾意左睇魚魚，
不過其實佢阿媽我有D驚佢忍唔住衝落海!!
(JimJim OS: 依家媽咪眅住，唯有扮乖一下啦~ )



其中一日天陰有風，當然要去行下山吹吹風。
呢段山路有幾個位都幾崎嶇，要出動媽咪抱抱。
唔建議亦應該唔會再行啦～



因為係第一次行呢段山路，JimJim 好似當係去探險喎，
都不知幾鬼開心，十足甩繩馬騮!!

話口未完就自己衝落山啦!!

(JimJim OS: 大海我來緊啦!!! 等我呀!!! )

行完山去海邊休息一下，少爺自動波趴係碼頭邊休息。



當大家都係碼頭休息傾計既時候，
有位心懷不鬼既小子靜雞雞有所行動!!

媽咪: JimJim你想行去邊呀?
JimJim: 無呀，有海風吹好爽呀，四周睇下風景咋嘛!
媽咪: 唔准游水水呀，仲要行返上山返去架!!!
JimJim: 傻啦～講呢Ｄ，我咁乖點會呢!!!



媽咪太大意啦，以為少爺真係會乖，
點知......有狗行左去石灘變左濕水狗!!
果個係水中奸笑望住媽咪既眼神，
呢位少爺根本就係早有預謀，唔濕身唔安樂!!!
因為實在太太太接受唔到啦，所以當下個刻唔記得左影相!!

反正跳左落海濕左身，點都係要沖涼架啦，
返到村唯有俾少爺游多轉，咁樣好似洗都洗得抵Ｄ，哈哈!!!



如願以償既少爺都真笑到不得了!!
知啦，知你真係好鍾意游水呀嘛!!
不過下次咁凍就最好唔好啦，企係海邊都就快變冰條!!
仲有呀，冷親咁點算呢??!!
人地以為我虐待你呀!!!



笑得咁甜應該唔似俾人虐待卦??!!
大家放心，少爺都只係游多左兩個圈就俾我催返上岸啦!!
少爺身體強壯，無冷親呀!!

聖誕假期之旅就係少爺暢快游冬游、
阿媽嚇親唔知好嬲定好笑既特備節目下完滿結束啦！！

期待下次出遊啦～