平淡簡單過聖誕

一年之中小妹最鍾意就係聖誕節，
四周都充滿歡樂氣氛!!

以前讀書年代就最鍾意同人迫，
去尖沙咀唔知做咩迫來迫去就開心。
不過今時今日(老左?!) 就寧願留係屋企或者去少人既地方，
同屋企人過個簡單而寧靜既聖誕就心滿意足囉~

所以... 12月25、26日就同屋企人去左西貢渡假屋避世啦~~~~

少爺有得搭船就鬼咁開心!!



天公造美，個兩日天氣稍微回暖，仲有大太陽，非常舒服。
拿拿聲叫少爺擺幾個陽光美少年既 Post 晒下先~
心情靚果然交足功課、俾足戲，哈哈!!



每次去西貢渡假屋，少爺都要去游下水先安樂。
不過而家係冬天，仲要寒流來襲得返13、14度，
我當然係拒絕少爺既請求啦~~
不過甩繩馬騮既少爺，居然唔聽話違抗母命!!
劇情發展請睇以下四格小劇場~



當阿媽使出獅子吼，少爺已經浸濕左半個身，
見個阿媽發癲咁叫，少爺亦立即彈跳上岸，
再使出三十六著走為上著，逃之夭夭。

無計!!唯有冷得我騰騰震咁幫少爺沖涼吹毛!!
仔呀仔，冷親點算呢!!??



夜晚當然係BBQ營火會啦~
圍住火爐燒下傾下食下。

無五光十色既聖誕燈飾，無喧鬧歡呼既人群，
但就有暖笠笠既營火，至愛既親人朋友，平淡而滿足~

[25 Dec 2013]

今日係除夕夜，希望各位 2014 健健康康，幸福滿瀉!!