冬日南丫島行

上星期見到Blog友冬冬去左南丫島玩，
原來南丫島唔似長洲咁旺，加上最近天氣又非常適合郊遊，
立即決定帶JimJim去逛一逛!!

因為未去過南丫島，所以上網查一下計劃下行程。
原來南丫島係發哥(周潤發)既故鄉，
係香港第三大島嶼(排係大嶼山及香港仔之後)。
可以係中環或香港仔搭船去，
而且所有航班都可以帶寵物乘搭!! (忽然覺得港九小輪公司好文明呀!!!)



原來榕樹灣及索罟灣都有船搭，所以唔需要走回頭路。
於是週末一早就發出由中環搭船到榕樹灣。


(圖片來源 http://www.discoverhongkong.com)

串過榕樹灣大街向山上走，就會來到風采發電站。
原來香港都有呢D大風車架!!



之後來到洪聖爺灘。
可惜呢個係康文署既泳灘，夏天有救生員既日子少爺就唔來得嚕 >"<
知道無得游水既JimJim對沙灘一D興趣都無!!



一直沿家樂徑行到上山，風景好靚。
沿路發現身邊出現既都係內地人，真係10個有8個都係!!
唔通佢地行厭左大商場改行山??!!



行到去近索罟灣，仲有一個沙灘(蘆鬚城沙灘)，
不過又係康文署沙灘!!  仲大大隻牌寫住「禁止寵物進入」!!
我真係唔明，人類沙灘已經有咁多，
一個離島既其中一個沙灘仔俾狗狗玩下游下水都得卦??!!
睇黎夏天既南丫島不宜嬉水!!

去到蘆鬚城前會見到此幅大豬塗鴉，
當然要叫我家小肥豬扮一下啦~~ 你話係咪好似先!!



最後行到差不多近碼頭，見到居民既自家小菜園，
打理得非常好，生菜、菜芯都可以收割食得囉~



行畢全程大概用左5小時，行下坐下食下，
非常悠閒，一D都唔趕，而且道路平坦，
只有去一兩個觀景亭雖要抱少爺行樓梯，
總括冬天呢個天氣去非常GOOD!!

最後來張是日少爺與媽媽合照 (少爺依舊擺款唔望鏡頭)，
結束愉快旅程。



[7 December 2013]