2015首爾自由行 - Day 2-2 三清洞BeansBins Coffee/ 仁寺洞/ 明洞조가비(貝殼料理)/ TwoTwo炸雞

上篇提要: 終於行完北村八景去到三清洞啦~

三清洞出名多Cafe，當然要試下兼休息一下。
安排行程時就發現好多人推介BeansBins Coffee ，
大大件Waffles 鋪滿大大粒鮮果&雪糕真係好吸引，
八景石階梯行落黎行前少少就係 BeansBins Coffee 三清洞店，
當然不能錯過~



二、三樓就係BeansBins，座位很多，
於二樓Order俾錢後就搵位坐低等BB响~
(韓國大部份Cafe都係付款後會給一個電子小裝置，
等食品準備好小裝置就會發出BB聲或震動提示客人回去櫃台取食物)



我地選坐二樓位置，有一個小露台，絕對感受到三清洞充滿悠閒既氣息。
今次點了招牌 Waffle (佢既Waffles 超出名!!) ，仲有大大杯既芒果刨冰。
芒果刨冰好有層次，有芒果雪糕、芒果茸、芒果粒、底部仲有芒果肉架!!!
大熱天時食冰冰真係好爽!! 雖然好似好大杯咁，不過都食晒無得剩!!
當時Manu 既士多啤梨因為季節已過，所以所有士多啤梨都變成葡萄啦~
(不過我地仲係明洞街邊買到好大好甜既士多啤梨食喎!!??)
我既重點推薦係.....芒果刨冰!!! 當然Waffle係必食啦~
除左三清洞外，明洞、新沙洞、惠化、弘大都有分店!!!



食飽抖夠就開始 Shopping 行程啦~
三清洞兩旁佈滿不同Style 既時裝店、飾物店、鞋店、咖啡店、料理店..



呢間Shop 記得「流行首爾」都有介紹，係買二手衫，露台既長頸鹿係signature。
每家都各有風格特式，齋行唔買都係一種享受，當然買到就更好啦~
最後三清洞戰利品包括 kawii襪、頭飾、耳環、布鞋二對。



一直行沿路逛回安國站，過左條大馬路，就會去到仁寺洞。
旅遊書寫仁寺洞充滿古式古香建築及擺設、營造了傳統文藝氣息，係一條文化街。
走過條大馬路真係好似行左時光隧道咁，返左去幾十年前既"廟街"!!
兩邊既Shop 大部份係賣毛筆、紙品、古玩擺設。



行左陣就見到仁寺洞既Signature shopping Mall 「S samziegil」(人人廣場)，
旅遊書既介紹係: 「青年人既最新蒲點，極具人氣」，
呢個商場俾我既感覺好似我地以前D屋村商場咁...
不過我認藝術呢D野我真係唔太有研究。



另外，原本筆記左附近既「鐘路三街」有韓式掃街小食，
搵左一陣都搵唔到就放棄，行返去MTR既時候又無意中係一條內街盡頭見到，
之不過.....現場所見同書中描述既都有幾大差別，
最後我地都無幫襯就走啦~

如果你問我仁寺洞排唔排行程好...
umm...如果你愛毛筆紙品、傳統擺設，又或係非常有藝術修養的話就要去囉...
但如果唔係...係三清洞行多一陣會開心D~
仲有如果要食韓式小食都係明洞街多好多、乾淨好多、吸引好多啦~



返到明洞，先回酒店稍事休息，
因為今晚 Dinner 就係去酒店過兩個街口既 조가비(貝殼料理)。
話說明洞附近既海鮮料理都唔少，會選呢間都係因為 Blog友 Ceci 推介，
佢既食評係"超好吃超推薦"!!
如此推介，而且離酒店咁近，真係不得不試。

大概八點左右到達，大部份客人都係本地人，亦有幾枱中外遊客。
晚餐既 Menu 應該跟午市不一樣，有一位講國語男士負責替我地落單。
佢介紹蒸具殼Set 及辣味海鮮鍋係最高人氣食品，
蒸具殼Set 分三個 size: M、L、Special。
但分別主要唔係多少，而係M係只包含一般蜆、小青口；
而L則多了帶子、小扇貝、北寄貝等2-3款具殼海鮮；
而Special又再多小鮑魚及中蝦。



結果我地點左一盤Ｌ，再外加一盤蒜茸烤大蝦、啤酒/汽水。
所有此店既海鮮都係選用韓國境內既新鮮海產，海產本身已經係非常新鮮甜美，
而且有Gas爐熱住食，唔怕凍左會有腥味。
蒜茸烤大蝦亦非常入味，蝦肉亦非常鮮美爽口，趁熱食最好!!
再配韓國啤酒，真係無得頂!!
話說呢幾餐試過三款不同牌子既韓國啤酒，都覺得清清地好易入口，
比起香港牌子既生啤好飲好多!!

另外亦偷偷望左隔離枱叫既辣味海鮮鍋，湯底顏色真係幾紅卜卜，
聞到都真係應該幾辣。如果喜歡食辣既朋友不妨試下。
仲有隔離枱既本地人仲有叫八爪魚刺身，D八爪魚雖然切開左一段段，
不過仲係郁郁下，有一小段我親眼望住佢由碟到爬左落枱面，哈哈～
其實新鮮既八爪魚我唔抗拒試，可惜家人話唔啱佢地，
叫一碟要我自己食晒又太多，所以最終無點啦～
而且由於是夜仲有一餐宵夜安排，所以唔想食太飽，
如果唔係再叫多一盤Ｌ都仲得呀!!
呢餐埋單７萬幾韓圜，絕對物超所值!!



正餐食完就到宵夜啦～　
如果睇過「來自星星的你」應該知道韓國人好鍾意食炸雞!!
亦吹起食炸雞熱潮，所以黎到首爾當然要試一試地道炸雞啦。
安排行程時筆記低韓國兩大炸雞熱店，分別係TwoTwo 及 Kyochon 1991，
兩間都係連鎖經營有多間分店係唔同地區。

係조가비斜對面就有一間TwoTwo啦～
咁順路就決定試下呢間先啦!!
點左原味炸雞拼盤 (₩16,000)，附送一小盒酸蘿蔔前菜。
因為大家都想返酒店沖完涼再慢慢食，所以外賣拎走。
另外，由仁寺洞回酒店前路過明洞大街，係街邊推車仔檔買左一盒士多啤梨，
好香好甜又大粒都只係 ₩5,000 一盒咋!!

不過炸雞味道只屬一般，定係我期望過高呢？
又或者可能係外賣關係，焗左一陣所以已經無咁好味？
不過呢間都只係其中一間炸雞店出品，下次再來一定會再試 kyochon 1991，
又或者第二間炸雞店既出品!!

精彩既 Day 2 係食完宵夜後完美結束啦～
又要瞓覺覺再來 Day 3 食玩買不停啦!!