2015首爾自由行 - Day 3&4 廣藏市場/ 梨大/ 弘大/ 小豬儲蓄罐(돼지저금통)/ Cafe Droptop

[終於有時間繼續首爾篇啦，差D要爛尾~ XD]
上篇提要: Day 2 去完三清洞仁寺洞之後，Day 3 主要活動就係行街Shopping啦~

要有氣有力行街，當然要食飽飽先啦!!
今日早餐安排去廣藏市場朝聖一下。
如果有睇開 Running Man 既朋友會唔會記得186集去過廣藏市場呢?
果集有CNBlue，佢地要鬥快去廣藏市場搵指定既攤檔搵野食，
所以今次我地就跟住佢地去過既檔口試下啦~



廣藏市場好大，主要用不同區域劃分，
例如生拌牛肉區、煎餅/綠豆餅區、米腸/豬蹄區等等...
我地早上十點半左右去到，有部份檔口仲未開檔，
不過幸好想食既都已經做緊生意啦~



跟著Running Man 食總共有三種:綠豆煎餅(녹두빈대떡)、毒品紫菜包饭(마약김밥)、大麥拌飯(보리비빔밥)。
話說賣綠豆煎餅既檔口多都不得了，
Running Man 去過果間就叫順熙家綠豆煎餅(순희네빈대떡)，位置:동부B 14호。
因為係即叫即炸，所以非常香脆&熱騰騰，
食完覺得...好脆但無咩味，一人一小塊淺嚐就好夠啦，
而且雖然係小塊，可能係豆既關係，非常飽肚。

再來就係毒品紫菜包饭(마약김밥)，當然唔係咩毒品啦，應該係傳統叫法卦~
Running Man去呢間: 元祖毒藥/麻藥紫菜包饭2号店 (원조마약김밥 2호점)，位置:南1門街與東門街的交叉口。
呢間好好笑，話說我拿住自己既行程，上面Print左間鋪既相方便我搵，
我低頭望下張行程又行下，忽然間行過左一間鋪頭時，有位阿珠媽向我揮手，
我抬頭望下佢個招牌，原來就係我要搵果間啦!!
阿珠媽仲借我個行程黎睇，見到自己係張相入面仲非常開心，哈哈~



最後就係大麥拌飯(보리비빔밥)啦，可惜我地食完之前兩樣已經覺得飽，
去到見到拌飯都幾大碗就放棄左啦。
如果大家去試，記住話我知好唔好味啦!!
其實廣藏市場除左食之外，仲有好多野賣，布呀、生活雜貨、醃製食物、海鮮等等。
我覺得如果食得辣既朋友係廣藏可以買泡菜、醃製食物試下，應該好地道!
行完廣藏市場就出發去下一站 --- 梨大啦~



梨花女子大學除左係大學，係佢附近既地方由於係大學生出沒既地方，
都變成有好多潮野買同好野食既商圈，所以係Shopping 熱點。
不過除左Shopping，一場去到當然要去校園幾個熱點影下Check-in相啦~
梨花牆、大禮堂、大峽谷一定唔少得啦~
本來仲有一條櫻花步道，不過我地去既時間已經過晒櫻花季，所以無去啦。



影完相，就出發去對面，認住呢隻紅色高踭鞋就即可以開始 shopping 啦~
行梨大主打係行街頭兩旁既店，原來韓國人真係好鍾意襪，賣襪既鋪頭多到不得了。



去之前有朋友同我講，梨大賣既衫比較便宜，未必啱心水。
但係我去之後發現只要細心搵就會發現有D 小店都有好野，
平時返工既衫我都買到幾件呀，大概40,000W左右一件，
而且唔一定係HK賣既大路款。



臨離開梨大前去食個 Tea 先，因為Jim婆婆好Like 芒果，所以揀左Mango Six。
Mango Six 都係連鎖式Cafe，聽聞李敏鎬既「繼承者們」都有係呢間取景，
入到去果然貼左好多劇照。
點左必試既Mango Coconut Smoothie，果真好 Mango!! (哈哈，廢話!)
食品Size比之前食過幾間都較少，不過其實一個女仔一份就剛剛好啦～
環境舒適，啱晒行到好攰既我地抖一抖，再去下一點出發。



下站弘大，弘益大學。同梨大一樣因為多學生潮人所以都形成商圈。
附近最出名應該係停車場街啦。
未去過之前係唔明點解叫停車場街，去到就明啦，原來中間真係停車場嚟～



其實呢度附近有幾個韓劇景點：弘益公園(韓劇《瑪麗外宿中》)、仿布拉格天文鐘(韓劇《對我而言可愛的她》)、Semo Café (韓劇《沒關係，是愛情》)。

前兩個都有去，第三個因為差不多要行到去下個地鐵站咁遠，
而且又未睇過套劇，所以無去到啦。

原來呢個仿布拉格天文鐘係一間酒巴....不過外表確實幾另類幾特別。



話說當日弘益公園有function，有幾位朋友係度夾Band唱歌，
所以擠滿人，想影張少人ＤＤ既相都無可能，唉，有Ｄ失望啦～



另外係弘大有3CE旗艋店Style Nanda，小妹推薦要去逛一逛。
主打係3CE既化妝品!! 真係好多選擇，齊款齊色!!
比係ＨＫ既ＩＴ買平!! 買得多仲有得退稅呀！
佢其實都有衫賣，不過款式太潮唔係我style。



好啦～行下行下就天黑啦，係時候醫肚。
就係附近熱店「小豬儲蓄罐」（돼지저금통）。



評語係...好得！好好味！
無論牛、豬都好好食，我地叫左一客牛、兩客豬、一客菇（其他個Ｄ係前菜），
燒得差不多就有店員黎幫手剪開一粒粒，非常好服務。
結果食完一輪後，忍唔住又再追加一客牛，
呢餐埋單又係食左7萬幾韓圜，好抵食！
食完後非常滿足，又飽又攰，打的回酒店完成Day 3啦。





其實果日係梨大去弘大之間，去左一間大型超市入貨買下手信，
間超市係一個 shopping mall 入面，
經過見到當時播緊既「Producer」(프로듀사) 廣告牌，
當然要同金秀賢合照一下啦～　哈哈！！
果shopping mall 當時既 decoration 係雨傘，真係另有一番感觸。



不知不覺首爾Trip 已經嚟到尾聲啦～
Day 4 食埋個早餐就要出發去機場啦!
呢個Trip既最後一餐揀左行過幾條街就到既 Cafe Droptop。
老實講係ＨＫ呢我就一定唔會食甜野做早餐，
不過韓國既吐司Waffles實在太好味啦，
為免返到ＨＫ太過思念，所以一定要把握機會再食多次！



幾年一次既旅行終於完結啦，韓國呢幾年真係變左唔少，
我覺得我會好快再黎過架！！哈哈～

話說返嚟ＨＫ之後，韓國就因為中東吸引綜合症大規模爆發，
好多ＨＫ團都陸續停止，之後仲紅色外交警示。
可幸 Jim家各人都身體壯健，一Ｄ徵狀都無，
反而係我Ｄ同事仲驚過我，問我點解唔自我隔離....
好彩最後ＨＫ都無本土確診既個案，只係虛驚一場。

因為呢次旅行，拋低 JimJim幾日，
所以做阿媽既係7月中已經安排左假期同JimJim去渡假補償返啦～
仲有幾篇Blog要追返，掛住少爺既大家，
請期待少爺2015夏令營既報導啦！！