[敗] Philips Airfryer 氣炸一番!!!

呢部 Philips Airfryer HD9240 就係我既廚房新玩意啦~

其實早於5月中時已經俾左錢，但係代理無貨，
足足等左一個月部機終於到家!!
收到貨到依家差不多二星期，
期間當然係不斷試機啦~~

傳說(?)中呢部機可以用好少油以氣流原理做出油炸效果，
所以中文名叫氣炸鍋。
傳說又話可以減少食物既油脂(Fat)80%，
所以別名又叫健炸鍋。
咁究竟係咪真係講到咁堅先??!!

經過兩星期既試機，以下就係小妹既少少個人用後感!!



小妹覺得如果處理多油份既肉類時(如雞翼、羊扒)，
真係唔需要加油，而且氣炸鍋仲會將油份迫出，
令完成品無咁油膩，顏色亦非常靚。
相反如果食物本身無咩油份(如沾了麵包糠既海鮮、蔬菜)，
氣炸完係會脆，但就明顯比較乾身啦。

買之前都有做過下功課，
其中有D BLOG分享話使用時無咩油煙，
而且食物亦無真正油炸咁熱氣。
小妹就覺得如果食物油份多的話，
其實使用時都會有油煙，同埋味都係會聞到，
而唔係講到完全唔覺咁誇張。
而「熱氣」呢方面，Jim家經過一星期多既試機後，
連好少生暗蒼既小妹及Jim婆婆都咁啱生左一粒....
所以呢.... 哈哈~ 應該都有D關係~

除左普通食材做出油炸效果既功能之外，
其實Airfryer既氣流原理同焗爐既氣流原理係相類似，
因此Airfryer都可以用來焗蛋糕架!!! (點中要害）　



我就試整左普遍蛋糕、Cheese cake及法式蘋果蛋糕 (Tôt-fait aux pommes)。
小妹覺得無得頂呀，時間快左(可能因為火力猛)，
使用時廚房溫度亦無咁熱，又可以做到焗爐既效果，
不過就係 size 比較細 (隨機送既焗盤約18cm)，
而且最高溫度亦只得200度，
但就真係感覺方便簡單左，所以依家變左甜品狂，
每日都想做一款飯後甜品!!



至於清洗問題呢，因為HD9240係新型號，
容量比之前舊型號大，grill pan 呢樣配件暫時都未有適合9240，
所以食物都係要放係個網上，用後就比較難清洗。
不過我既習慣係將個網浸於水中 20-30 mins，
之後再洗就容易好多啦。

用後既結論就係......真係好用方便都無朋友呀!!
之但係，雖然話用Airfryer處理食物可以減少80%油脂，
不過我都幾肯定食炸物既機會一定多左20%或以上!!!
Well~ 值唔值得買呢條數就要自己大家計下囉～

我已經諗好下星期試咩啦～
下次再分享！！