2015首爾自由行 - Day1 明洞Cafe Coin/ N Seoul Tower南山塔/ 景福宮烤肉店(韓燒+醬蟹)

首爾之旅，終於入正題啦~

第一日搭 0725 機，到達首爾仁川機場已經中午12點左右 (南韓快HK一個鐘)。
過完海關攞埋行李，跟住就去機場便利店買 T-money 卡及飲品。
T-money卡即係好似HK 既八達通咁，用黎搭MTR、巴士等交通工具。
一張₩2,500，但要另外再充值。

韓國既便利店每間都有好多種不同口味既牛奶及Yogurt 選擇，
係機場已經急不及待買左呢幾支試試。
個人覺得紫色果支 Blueberry Yogurt 真係好好味，大家見到一定要試下。
右上藍色係椰子味牛奶、右下則係士多啤利味益力多咁，全部都好飲!!



之後就要搵機場巴士搭啦，之前Check左6015號於 ibis 酒店前就有站，車費每位₩10,000。
上車前會有幾位大叔幫你放好行李，然後用韓文問你邊個站落，
溝通唔到的話只要指一指車站牌既名就OK，然後就會俾個行李NO.貼子過你啦。
上車後就俾現金司機就可以搵個位坐低。
關於搭機場巴士既資料可以去「韓巢」搵搵，資料非常齊全。

車程大約70分鐘左右，所以去到酒店已經係下午2:30啦，可以立即Check-in。

上房放好行李，稍事休息就再出發啦，第一件事當然要醫醫肚先!!
[關於酒店 ibis Ambassador Seoul Myeongdong 介紹可以睇返上一篇出發前準備(2)]

第一站係位於明洞圈內既 Cafe Coin 1號店 (카페 코인1호점)。

酒店行出黎大路既小食亭見到可愛狗狗~



韓國人真係好愛Cafe文化，不同路線既Cafe 真係多到不得了。
揀 Cafe Coin 因為睇到 Blog友介紹，環境好優雅，
亦因為係韓劇「請回答1994」既場景而多人冒名而來。
旅遊書亦介紹佢既自磨抹茶紅豆冰出名。

其實都幾難搵，小小門面(相比隔離超大既連鎖Cafe)，
見到Tommy Hilfiger 之後靠左直行半條街就係左手邊啦，
最後靠 Naver Map 幫手搵到!!



選左閣樓位置坐低，寧靜柔和既燈光下真係同出面喧鬧既明洞截然不同。
店員有禮貌，開始時想用簡單國語同我溝通，
不過我實在聽唔明韓國人口音既國語... 哈哈~



當然要試抹茶紅豆冰，另外Ice-cream Waffle Set 都好好味，
碟上小杯既係原味yogurt雪糕，另外可再選兩種口味雪糕。
Jim婆婆因為唔想飲coffee，但又想飲凍飲，
最後叫左一杯「五味子茶」(오미자차)，鮮紅色飲落"酸酸咪咪"咁，都幾得意。



天氣咁熱嘆完冰及雪糕真係舒服晒~~
下一站係 N Seoul Tower 南山塔 (서울타워)，因為想要影日落及夜景，
查過要成 7:28 pm 先日落，所以仲有時間就係附近逛逛街。
大概5點幾街上開始出現小販推車仔檔出現，
有好多街頭小食、水果都好吸引，但啱啱食完TEA實在食唔落啦~



差不多時間就開始慢慢向南山塔方向進發。
五月尾既首爾已經開始又曬又熱，溫度大約三十度左右，日光時間亦變得比較長。
行到山腳可以選乘電梯或者行人路上山腰，之後就要俾錢搭纜車上山啦~
盛惠成人每位₩8,500 (來回)。



唔使幾分鐘就去到山上，由纜車站行出黎就見到綠油油既山路，
加上將近黃昏既日光，好美!!



N Seoul Tower 舊名南山塔，亦係「來自星星的你」既重要場景之一，
劇中都敏俊씨應承千頌依係南山塔慶祝100日拍拖紀念，結果只出現到1秒。
其實呢度本來就係非常有名情侶扣上情人鎖既地方，D鎖真係多到不得了!!
行出纜車站後到山頂既廣場就不停見到一埋又一埋被人扣滿鎖既"樹"。



途中見到一、兩個小攤檔有賣呢D「情人鎖」，再唔係去到山上既廣場紀念品店亦有賣。
山頂廣場有一個落樓梯既商場入口，如果要上瞭望塔就要去果度搭Lift。
而廣場另一邊亦有兩層餐廳、Teddy Bear 紀念品店、Cold Stone等，
可以行上一層繼續"上鎖"或睇風景。



終於等到差不多日落時份，本來計劃上瞭望塔影首爾夜景，
但係因為個個都話好攰無興趣，叫我自己上喎。
一個人上去影景，又無人聽我講「嘩~好靚呀!」、又無人幫我揸機影相，
仲要俾多₩9,000 好似唔係好抵喎 (婆計數係咁計既~ XD)。



所以最終放棄左，只係廣場個瞭望台影既張首爾夜景就算啦~
不過反正我攝影技術不精，應該俾錢上去影既都係差不多架啦!!



真係天黑晒要等到晚上八點，所以影完相就立即落山去食晚餐。
第一餐就梗係要食韓燒啦，「景福宮」烤肉店 (경복궁)。



呢間係烤肉店老字號(開店已經十幾年啦)，
比起其他近期熱店如「姜東虎」呀、「哈哈401」呀，「景福宮」屬於偏貴。
揀「景福宮」一來同事去過話好、二來Blog友介紹係"超推薦"!!!
而最重要最重要係...... Manu 有醬蟹!!
要知道只係去四日，但就有好多野想食，所以每餐都要好好安排。
能夠一餐食到晒兩種想要食既，真係唔去唔得啦~

去到餐廳已經過左八點半啦，只得我地一枱遊客，其他都係本地人。
坐低之後有一位大叔走過來，用純正國語問我地可以落單未。
初時點左一份韓牛拼盤、醬蟹、辣味海鮮鍋飯、啤酒/汽水。
大叔提議多叫一份牛肉，所以又多叫一份牛肋骨。



包括前菜，每樣都好好食，韓牛非常美味，鍋飯愈食愈辣!! >"<
雖然最後有D叫多左既感覺，但係太好味啦，最終都食晒所有韓牛!!!
今次選擇偏貴既景福宮真係絕對無錯，韓牛好味、醬蟹都無得嘆!!
今餐食左十幾萬韓圜，亦係成個 Trip 最貴既一餐!!
但絕對值得，而且比起係HK食同樣質素既韓燒一定唔止呢個價啦。

食完之後慢慢行返酒店，應該係捧住個肚慢慢行返酒店至啱。
雖然已經係晚上十點半左右，但有幾條街好似大攤檔咁，
坐滿年青西裝友/OL係度食野飲酒，行到酒店樓下係大巴士站，
仲有一大埋應該係OT完等緊搭巴士返屋企既年輕人。
首爾治安真係幾好!!

Day 1 舟車勞頓，飛機上又補唔到眠，返到酒店已經有D頭痛啦!!
拿拿臨瞓覺，Day 2 又要開始啦~~