2015首爾自由行 - 出發前準備(1)寵物酒店

話說 Jim 家已經4年多無一家人去過外地旅行啦~
其中一個主要原因就係唔捨得留低少爺。
今次各人假期剛好夾得上，最重要係心儀既寵物酒店終於訂到，
但係去太耐都係唔放心(當然指唔放心少爺啦)，
所以四日已經係有分離焦慮症既媽咪(即係我) 既極限啦。
四日去得邊呢? 都不外乎係東南亞架啦~
近年韓劇、韓國衫、韓國護膚品熱爆，二話不說就決定左去首爾啦!!

以前都去過兩次韓國，不過都已經係7、8年前既事啦。
當年係跟旅行團，去下景福宮、樂天世界、滑雪場咁，
所以首爾自由行係第一次啦~



成日見人寫旅行遊記，自己呢次去首爾編排行程亦做左唔少功課、睇左唔少BLOG，
不過發現好少首爾自由行既BLOG係香港人寫(只係搵到兩三個)，
其他多數係台灣人寫既。
唔係好多HK人去既咩?
明明係首爾四日去到邊總有幾個講廣東話既人係附近架!!
或者HK人多數係拎住旅遊書玩，詳細遊記好少 (定係我唔識搵呢?!)
好彩睇開既BLOG友亦不乏喜歡去首爾旅行，一於參考參考!!
今次等我都為自己既首爾行記錄一下，
有興趣既朋友也可以作為參考啦(如果有用的話!!)~

所以呢緊幾篇都會係首爾遊記囉~
想睇少爺既朋友，應該得呢篇(寵物酒店準備) 見到少爺啦!!

關於寵物酒店，其實耐唔耐都會見到D關於住寵物酒店而受傷既事件，
所以就更加唔放心，真係要搵一間自己認為信得過既先放心DD，
JimJim 8個月大既時間又係因為 Jim 家旅行而迫住左幾日酒店，
返來時無穿無爛，於是今次都再次去返同一間。
但係此店已搬左去較細既地方，酒店房間變成只有6間，
真係可謂一宿難求，早兩個月前 BOOK 定、仲要唔係旺季先有位。



提前一日送少爺去酒店(因為第二日早機)，返到屋企已經好掛住啦~
Check-in 完立即問定可唔可以每日打電話問下少爺情況 (OK~ 無問題)、
如果可以請每日 whatsapp少爺既相或 vedio 以解媽媽既相思之苦 (OK~ 無問題)
跟住同少爺 Say goodbye 就要四日先再見啦~~

寵物酒店我唔打算介紹啦~ 因為真係要睇個人觀感，
亦要視乎Budget，少爺幫襯呢間屬於偏貴的。
不過有一D少Tips可以建議大家:

(1) 提前檢查針卡狗牌是否齊全，因為入住寵物酒店必須為有打年度預防針及已領取狗牌(有晶片) 既狗狗

(2) 出發前一星期開始就要每日同少爺/少姐講將會去酒店住幾日，見唔到媽咪/爸爸，要乖乖之類既說話，等佢地有心理準備。因為突然去到新環境又見唔到媽咪/爸爸好有可能會唔食野架!!

(3) 之前可以先準備一張 Notes，內容寫清楚寵物既習慣:
例如少爺/少姐唔鍾意人地摸佢邊度、早晚幾多餐、有無飯後甜心、懂尿尿於廁板上、好細膽之類，提醒負責照顧既店員。



(4) 建議將每餐狗糧先行量好分開獨立小包代好，一來唔怕每餐份量俾多俾少，二來店員餵時亦較方便。亦建議多準備一至兩餐份量作spare。由於擔心JimJim見唔到媽咪唔肯食野，所以每餐糧加了一支肉棒棒 (少爺至愛零食)，希望佢唔食正餐都食少食。

(5) 一般寵物酒店都會每日有一段時間為放風/遊戲時間，放狗狗出來走動一下。如果狗狗唔喜歡同其他同類玩 (好似少爺咁!!!) 就要預早同店員講清楚，以避免打架或受傷情況出現 (最唔想發生既情況!!!) 呢點亦要係NOTES寫清楚!!! <--呢點最重要!!!

(6) 準備一至兩件小玩具帶去寵物酒店陪下少爺/少姐，建議準備多一條有主人氣味既小毛巾帶去，因為當狗狗半夜一個時可能會靠嗅下主人既氣味以解寂寞。

(7) 準備一支用開既藥水/黃油以備不時之需。

如果同我一樣有分離焦慮症既媽咪，記住check-in 時詢問可唔可以每日打電話詢問情況，及請店員可以的話whatsapp相片以解相思之苦，當然要對方願意先可以啦。不過我諗一般都應該OK卦!!

第二、三日店員 whatsapp 我少爺既片段，少爺走來走去最後都走返去門口望住，
好似係等緊媽咪返去接佢咁~ 真係心痛死啦~



其實最好當然係有親戚朋友可以代為照顧，唔需要去陌生既寵物酒店住啦，
但係好似今次咁係家庭旅行就真無法啦，要辛苦 JimJim 啦!!

第四日落機立即飛的去接 JimJim，去到見到少爺安好總算放心，
不過應該呢幾日都瞓得唔好，個靚仔樣唔見左!!!
隔左一日終於回復正常啦~

下篇繼續首爾之旅 - 出發前準備!!!