我家少爺Jim ☆ JimJim the Corgi ☆: 2015首爾自由行

繼續首爾之旅 - 出發前準備篇。

同事話我係港女，因為"首爾"加"shopping"加"廉航"喎~
(追韓流?? 又要買野但又要慳??)，
Fine~ 如果係咁，我認我係港女囉~ 而且仲係一個婆仔，
專計婆仔數，不過睇漏條大數果隻，哈哈!!

<關於機票>
今次訂左 HK Express 香港飛首爾仁川機場，網上訂機票好方便。
連埋回程加20kg luggage (為shopping 作好準備!!)，劃位extra fee (普通位)，
比起CX 同日同時間足足平左成HK$1,200一位，
我呢D婆仔數點會唔立即買呀!!
細細聲講，今次係小妹第一次幫襯廉航啦~

計過要坐3個半鐘左右，加上由機場搭巴士去酒店要大約75 mins，
酒店要下午兩點先可以check-in，
Book 0725 去到 1200 就啱啱好啦~
其實 0725 機即係最遲要 0600 要到機場 check-in，
加上小妹係果種唔到最後個刻都唔執行李既人，所以都好似無咩瞓過就要出門口啦。
好彩以前份工已練成任何地方都可以瞓著既絕技，唯有係飛機上補眠。

搭後感.... 應該下次會搭返 CX 好啦...
首先等取行李真係比其他 airline 耐好多好多好多!!!! (要講三次因為真係好耐!!
定係我黑仔呢?! 同事話係人都知佢耐啦~
CHUR~ 我唔係道聽途說既人，要自己試過先係真!!
但係.... 原來真係真既~
再來... 因為附近既年輕少男少女、中年婦人都真係精力好我好多，
佢地可以成程機郁來郁去，不停講野。
救命呀!!! 放過我俾我"恰一恰"好唔好???!!!!
三來... 回程時delay左，嚇得我好怕接唔到少爺返屋企!! <--- 最不可饒恕!!!

<關於酒店>
今次又再次衰貪平!!
話說search 過幾個網上訂酒店既網站，
最後發現 Zuji.com 同一間酒店有promotion，婆仔數既我又二話不說訂左先!!
點知.... 48小時後仲未收到 booking confirmation，就打去 hotline 問下。
CS話會處理叫我等多半日，再等左3小時後終於收到啦~
點知..... 我BOOK三晚結果confirmation 只得二晚!!!
搞來搞去又一日，最後先成功收到另一張booking confirmation加多一晚。
心入面都係唔放心，又再直接 send email 去該酒店 confirm，
好彩最後收到酒店回覆並承諾三晚沿用同一房間。
之後同朋友傾開，原來呢個網站一向多評語，下次都係唔好貪平啦!!

講返間酒店，今次訂左位於明洞圈入面既 ibis Ambassador Seoul Myeongdong。
位置真係超一流，對面係 Lotte Duty Free 同 Lotte Department Store，
後面街就係明洞商圈，真係可以爭取每分每秒 shopping!!
房間都好乾淨，唔算太細，而且水量穩定，熱水好熱!! <--- 個人認為超重要!!
遇到既住客有來自日本、國內、台灣及歐美，住客質素OK~

<行程編排>
主要就係參考其他人既BLOG，亦有參考旅遊書 (首爾達人天書)。
但係老實講，旅遊書真係只有提供簡單介紹&地址，
至於個景點有咩吸引、值唔值去就真係要自己聯想下啦!!
所以呢，我今次既行程主要都係參考其他BLOG友。

另外推薦一個 website 真係超好用 --- 「韓巢」
website 有地圖、MTR 路線圖、仲可以計算埋距離、搭的士大概要幾錢，
雖然實際所用時間及幾錢有有差距既，不過大概叫做有個概念咁啦~
當安排行程時決定左大概要去邊幾個點之後，
我就係用呢個網既韓國地圖先查好位置，Copy埋店名&地址 (韓文店名及地址好重要!!)，
去到就不至於太茫茫然不知東南西北啦。

再來推薦一個手機App 「Naver Map」
我就係靠佢係首爾搵路架啦~ (小妹係輕微路痴 XD)
不過佢要打韓文店名或韓文地址，
個App 唔識英文，除非店名真係英文，唔係會話俾你知搵唔到，
所以如果唔太識韓文就唯有用 Google Map 啦。

<Pocket Wifi>
要用地圖當然要有穩定既 wifi 啦，今次租左 Pocket Wifi 幾個人share 一齊用。
如果只係兩個人亦可考慮買張韓國SIM卡。
我幫襯既 Pocket Wifi 要預早一日去門市攞定，交還就係投入係香港機場設有既回收箱。
其實 Pocket Wifi 租借有好多選擇，我唔特別推薦我用個間，
因為個機場回收箱真係有夠難搵!!!
其實去到韓國機場出境後先再租借亦可。

<關於換錢>
我係香港既找換店先兌換韓幣，兌換價大約0.0073，
多數BLOG友建議先換少量去到首爾再兌換會比較抵，
但係因為我怕麻煩，反正都係換就一次換晒啦~
而且亦可慳返係首爾換錢既時間。
兩間較為出名既兌換店位於中國大使館附近 (大使館及一品香)，可以看下圖參考。