2015首爾自由行 - Day 2-1 土俗村參雞湯/ 漫步北村八景

經過舟車勞頓既Day 1，養足精神再玩過啦~
因為今次呢個 Trip 其中一個重要任務係食，
為左要爭取食既機會，所以係訂酒店既時間已經決定左唔包早餐。
所以亦唔會有晨早起身落去cafe lounge 度食個早餐再瞓過既情節發生。
瞓飽飽先慢慢出門!!



Day 2 第一餐亦係早午餐，就黎人氣名店「土俗村參雞湯」(토속촌삼계탕)。
點解要係早午餐呢? 話明係人氣名店就知人氣旺啦，
排行程時已筆記低早上11點後就會出現長長既人龍，
為左唔想浪費時間排隊，加上食完有氣有力繼續之後既行程，
所以決定11點黎到食個早午餐啦。
果然11點左右係可以直入店內既!!!

Manu 有三種雞湯，山蔘培養根烏骨雞湯(₩28,000)、山蔘培養根蔘雞湯(₩21,000)、蔘雞湯(₩15,000)，我地試左頭兩款。
山蔘係另外一個小瓶要自己自行落，下面第一張係烏雞 (唔記得左放山蔘就影左啦)，第二張係普通雞 (鋪係面既就係山蔘啦~)。
另外仲有一小杯酒附送，此酒非常"梗" (好嗆喉)，可以就咁飲或倒入湯中!





雞湯好濃味，雞入面仲包住有一支小培養根蔘、紅棗、糯米，
我地無人食得晒成隻雞，但係已經非常滿足~
另外每兩桌中間有放置兩大盤泡菜及泡蘿蔔，可自行夾到小碟上慢慢享用，
因為我地都唔太食得辣、所以泡菜少食、反而泡蘿蔔無咁辣，巧巧味!!
值得一讚係店內既"阿珠媽"非常親切有禮貌，仲主動幫我地影合照!!

食飽飽就要去next stop啦.... 漫步北村八景。
北村 --- 擁有好多歷史悠久、保存完整傳統韓屋及小胡同既地方。
北村八景就係最能體現北村特色既八處風景點，
欣賞美麗既傳統韓屋、穿梭古老優雅既小胡同。



北村漫步第一步就要先去「北村文化中心」(북촌문화센터) 攞張八景地圖!!
跟住地圖走先唔會走錯路，或者行多左冤枉路。
行程筆記: 要順住八景逐個去先唔會迷路，而且係行最少路架!!



由MTR安國站3號出口行去文化中心會途經「昌德宮」既入口「敦化門」，
韓劇「屋塔房王世子」都有係呢度取景呀 (呢套我有睇!!哈哈~)
「昌德宮」可以入去參觀 (成人每位₩3,000)，
亦設有參觀「秘苑」既中/英文導賞團 (當然又另外付費)，
有興趣可以去 offical website 睇睇，可預先網上預約定秘苑導賞團。
不過今次我地只係門口影張相就走人啦~

攞完地圖，漫步北村八景正式開始!!

北村第一景: 昌德宮全景



由文化中心行出黎直行下坡就會見到「昌德宮」全景。
唔知係咪因為我矮，所謂既全景只係見到D屋頂~ 哈哈!!

北村第二景: 苑西洞工房街



沿住昌德宮石牆走到盡頭，就會去到第二景，
盡頭有傳統風箏作坊、宮廷飲食研究院等。
其實一路上都會見到各或各樣既小店/ 工作坊，每間都好有特色，反而更吸引我。
左上果間店係正條路中間，好似好危險咁，不過又好特別~

北村第三景: 北村路12街一帶



呢一帶既韓屋多為工房，小冊子寫有幾處工房可供體驗及欣賞韓屋內部結構與裝飾。
但就我所見只有一間提供韓服體驗既小屋可入內，
而其他幾處都係門口貼有告示歡迎入內參觀，不過需付入場費。

北村第四景: 北村路11街山崗



小冊子係咁寫既: 「上至高台可以盡覽北村路11街一帶全景。從數不清既瓦房到坐落在北村最頂端的李俊九故居都盡收眼底」。(李俊九, 美籍韓裔武術家，為美國武壇跆拳道界之頂級領導人物，有「美國跆拳道之父」之美稱 --- from biaike.baidu.com)

去到第五景就知道我地已經 Miss 左第四景，但係當時已經有D攰啦，
唔想返轉頭搵路，所以最後與第四景緣慳一面。此景應該會影到一片瓦頂房屋。
反而李俊九故居原本就曾經路過 (都係之後寫BLOG整理相片時先發現~)。

北村第五景: 嘉會洞小巷 (下坡)



此處嘉會洞係韓屋最密集、歷史遺址最多既地方。
亦係被喻為八景中最美一景，因為從此處放眼可以同時欣賞傳統韓屋，好似置為古時，
但遠處又有代表現代既 N Seoul Tower，是否有一種時空交錯既感覺呢?!

北村第六景: 嘉會洞小巷 (上坡)





其實係第五景同一段路，只不過係行落斜坡望返上去，不過又真係有另一番風景。
此處既韓屋係有人住緊架，所以都見到有「請勿喧嘩/請勿騷擾居民寧靜」此類標語，
係! 無錯! 係寫中文既!! 亦只有中文!! 點解無韓文無英文呢?
umm..... 大家意會啦，不解釋~

北村第七景: 北村路11街一帶







此景表現出韓屋雅靜、悠閒古樸的小巷風韻，亦可看到北村居民既平凡生活。
呢一帶又確實係比較寧靜古樸，終於可以影到D無路人經過既相啦~

北村第八景: 三清洞石階路



終於行到黎第八景，就係呢段古老既石階啦~
其實係同一條路有兩個位都有樓梯落去，一條比較狹小，
再行過少少既一條有一個小小牌仔寫有北村八景既韓文介紹先係真正既八景石階路。



係石階路上面望落下去就係三清洞啦~

雖然八景最終獨欠一景(第四景搵唔到)，不過我已經覺得我地好叻叻啦!!
其實係首爾市附近就可以欣賞到傳統韓屋，我覺得呢個景點值得一去。
大家除左 shopping 同食野之外，亦可考慮下呢個sightseeing既行程呀!

完成漫步北村八景，我地就落到去三清洞啦～
三清洞街道兩旁佈滿銀杏樹，此區有好多咖啡店、料理店及時裝店等，
部份由傳統韓屋改建成，係一個充滿藝術氣氛既地區。

消耗左咁多體力當然要補充返啦，一於去 Tea 一Tea。
下篇待續。