又大一歲啦~

Hello everybody~~
由於今次呢篇 BLOG 係關於本少爺3歲牛一既，
所以 Mommy 叫我親自寫喎!!
咁好啦~ 就等本少爺親自咬住執筆!!

10月5日就係我既正日生日啦!!
但係因為今年屋企發生左啲D事，所以唔可以大事慶祝，
所以Mommy就決定同我過二人世界，同我低調過生日~

因為要低調，所以Mommy今年無買Birthday cake，
不過話晒都係本大少爺既生日，點都要有DD唔同既~
首先就係超大牛奶骨頭+Spicy味圈圈!!! wow~




我完全唔明點解只可以二揀一食???  
點解唔可以一次過食晒佢地呢????
點解另外一樣要留返下次喎???
點解?? 點解?? 點解??

官方答案係咁樣食法會飽死!!!!
哈~太睇少本少爺個胃啦!!
以哥基唔知飽既性格，點會消化唔黎呢!!!
(Mommy: 呢D係眼闊肚窄、貪心既性格之卦!!!)
OK~ Anyway~ 咁我唯有揀大牛奶骨頭啦!!
不過呢舊骨都食左2粒鐘先食左一個頭個部份咋!!
(Mommy: 主要因為有人隻手太短同"論盡"食唔到!!! 哇哈哈!!!!)



奸妰既Mommy係呢個時候居然以食主菜既理由收埋左我舊骨頭!!!
實在太過份啦!!!
係無得選擇既情況下，我唯有寄望主菜啦!!
主菜就係 "雞肉三文魚什菜肉丸"
(其實咪就係例牌既鮮食加多樣三文魚呀菜呀，再變成丸狀咁囉 )
(Mommy: 衰仔!! 要變成丸狀要做多好多功夫架!! )
 Mommy 話三文魚好有營養，又有Omega3，
想我食左聰明D聽話D喎~
計我話唔好理佢有無營養，總知有得食就得啦!!!!
材料同之前差不多，整法都差不多，
不過Mommy搞來搞去整左成2粒鐘先有得食.....
終於整好啦~~~~ 睇個樣都應該入得口唔錯既~~



當然又係要影返張招牌笑容相先有得食啦!!! 
 點解生日都無得例外架!!!
好啦~好啦~
我係一個乖既小朋友，
就順從Mommy意思啦~ 笑容夠燦爛未!!!

WA~ 份量果然比平時多呀!!
有成4粒大肉丸!!  Yummy~~~
我當然以9秒9既速度食晒佢啦!! 大滿足呀!!今年生日雖然無Birthday cake，
不過有Mommy既愛心肉丸搭夠，
希望以後每年都有食唔完既大牛奶骨頭+Spicy味圈圈+肉丸+........
不過最重要就係要有Mommy一直陪我照顧我啦~~
(Mommy: JimJim要健健康康、開開心心咁一直陪伴住Mommy呀!!!!!)

==========  同場加映 JimJim 生活照 ===========

(1) 水果網婆婆造型 ~~~ 悄!!!



(2) 食飽飯睇電視 ~~~ 爽!!!



(3) 都係食飽飯睇電視 ~~~ 醒!!!



(4) 忽然沉思 - 型!!!!



(5) 忘我玩炸蝦 ~~~ 傻!!!!!