熱爆海岸線之暢游長洲

呢排有套電視劇《情越海岸線》係長洲取景，Jim婆婆話好多年無去過長洲，

於是乎就計劃週末去長洲一日遊。

剛過去既星期五、六、日終於大好天，結束左連續35日既下雨天!!

大好天都不得止，仲要係酷熱天氣警告 !!  

 

搞到我心大心細，唔知呢個長洲遊好唔好帶埋少爺去。

諗諗下長洲有幾個沙灘，咁... 不如就去埋游水，就唔怕熱死啦~~

= + = + = + = +   出 。 發 。 嚕 。+ = + = + = + = +

當日我地搭9點船出發，因為都仲早，所以太陽都未係好猛烈。



喜愛搭船船既 JimJim 當然要去船邊吹下海風啦~



經過大概60分鐘既船程，終於到左長洲啦~
JimJim: Let's go~

假日既長洲真係旺過旺角呀!! 一行出碼頭就已經人頭湧湧 



我地向住東灘方向行，經過出名既大粒魚旦，當然要食返串先啦~
(因為人多又要拉住JimJim又要拿住串魚旦，所以全程食既野都係影唔到相既!!)
經過一間以歐陸風格出名既B&B，JimJim 當然要同佢門口既偽店狗合照留念啦~
搞咩要搵個屁屁對住人地架!!

沿途會經過出名既紅豆餅店，但太早仲未開門。
過左東灘就會見到華威酒店，如果過夜既話住呢度都唔錯，
個 view 對住東灘，去游水非常方便。



行下行下，忽然好嘈，原來有架飛行服務隊既直昇機要降落，
應該係有人需要由直昇機送出去香港既醫院。



因為得一條路，而架直昇機都停左大概10分鐘度 (我諗應該都唔係好緊急下)，
所以我地唯有企係附近等到架直昇機離開，我地先可以通過。
JimJim 非常醒目，識得搵樹 (?)...唔係...應該係草陰.... 遮一遮太陽~



當日天氣真係好到不得了，藍天白雲當然要碧波暢游啦~
長洲當然唔少得滑浪風帆，當日都好多人玩。



熱到爆既少爺一聽到我話可以落水啦，就一支箭咁衝左落海。



有得游水既 JimJim 真係開心到不得了 !! 總算帶埋少爺出黎玩係無錯既~



游左大概45分鐘就攰要上岸啦~ 補充下水份先!!



= + = + = 出 遊 小 貼 士 = + = + =

提提大家，夏天 帶小朋友出遊，記住準備充足既水 ，不時提醒小朋友飲水。
另外，我仲會準備一個裝滿水雪凍左既噴水壺，時不時向小爺噴下，等佢可以降溫。
仲有，因為太陽太猛的話，地面會非常熱，要留意小朋友會唔會行行下坐左係度唔想行，
如果係就表示太熱啦，辣親腳仔要抱抱!!
少爺回程時要佢阿媽我抱返去碼頭，真係力的表現呀!!
所以如果有車車真係建議帶埋去，因為人多單車多，坐車車方便好多。

= + = + = + = + = + = + = + = + = + =

最後買埋長洲特產「平安飽」就搭 3:15 船返香港，完成呢個酷熱之旅。



今次天氣太熱，好多景點都無去到，例如小長城、關公廟.... 等秋涼先再行啦!!
夏天都係游水最爽!!


(記錄完畢。)