鮮茄焗豬扒飯

好友幫忙代敗LC 焗盤，呢個星期就整樣野黎開光。
諗來諗去都係整焗豬扒飯好食又方便。

由於自家製材料當然選自己喜歡，
豬扒就用西班牙黑毛豬扒。
其實本身覺得豬扒太厚煮完都偏"鞋"，
呢隻黑毛豬扒薄薄地，煎完焗完一D都唔"鞋"呀!!
一pack 有6片，雖然貴左少少，但耐唔耐食一下都OK~
因為肉質嫩，所以只用海鹽、黑糊椒及橄欖油醃1小時，然後煎一煎。



其他配料就有洋蔥(半個)、紅椒/三色椒(一個)、白椰菜(1/3個)。
將以上配料切小件，下鑊用蒜茸爆炒。(26媽咪爆炒最啱啦~~~)
其實唔放白椰菜可以改放其他喜歡既蔬菜亦可，
因為小妹喜歡白椰菜而且炒完焗完仍然有咬口。



至於個汁呢，因為個人喜好唔鍾意太酸，所以唔選用茄膏或加茄汁。
今次用左呢罐 Stewed Tomatoes，好似浸溶左既原隻蕃茄咁，
我另外加一個新鮮蕃茄(切細件)一齊煮。
當煮到罐頭既蕃茄溶得七七八八，新鮮既蕃茄就差不多溶溶地既質地啦。
呢個時候先再試味，睇下需唔需要加糖中和。
我就只加左 1/4 茶匙就已經覺得OK啦~
咁樣就唔使加成4、5茶匙糖去中和茄膏既酸味，好似健康少少。
如果係嗜酸既朋友當然可以用茄膏去煮啦!!!

再黎就係個炒飯底啦。
先將 1/2 隻蛋汁下鑊，待半熟將白飯加入炒。
炒到乾身時再將餘下 1/2 隻蛋汁加入再炒至均匀。
將炒飯放焗盤，然後鋪上豬扒 (最好不要重疊)，再放上配料。
最後將個汁均匀淋上面，最後加上幾片 Mozzarella cheese 及灑上Parmesan cheese。
放入焗爐180度15分即成。



因為我求其將幾片芝士放上面，所以焗出黎成品唔多靚。
仲有仲有，下次要"的"起心肝認真地幫成品拍張靚相!!!

講到焗豬扒飯呢，不得不提"大檸樂"既一哥，
都真係快餐店鎮店之寶，不過塊豬扒雖然話係厚切，但係就愈來愈細塊。
而且不同分店好似質素也有差別。
將自家製學上手，第時想食就自己做足料版啦~~~