呢篇寫了大部份一直係Draft狀態，今日再開返個Blog 先發現，寫左無理由唔post，再睇一次好彩有寫，可以回味返當時旅行既興奮。
Day 3
來到第三日，今日要去有馬酒泉酒店住一晚。
因為第四日返到大阪市都係住返同一間酒店，
所以我地只係執左一日既行李，輕鬆出發去有馬，
其餘既就留係酒店寄存。
出發前我地仲拜託酒店既前台職員幫我地打左個電話去將會入住既有馬溫泉酒店，
再次Confirm我地會準時出現，同埋安排車係火車站等我地。
(Tips: 如果有類似情況，強烈建議叫酒店既服務員幫手打呢個電話，
因為對方真係唔太懂英文，可能有馬始終唔係大城市，
如果要我講，可能講一粒鍾都confirm唔到 😖 )
其實有旅遊巴可以由梅田站往有馬，
但因為想欣賞沿途風光，又想搭下鄉郊啲既火車，
所以去程我地揀住轉幾次火車既方法。
坐下又轉下咁就到左有馬啦~~
一出火車站就會見到有有馬溫泉地圖，介紹呢個日本三大溫泉之鄉之一。
先嚟介紹下有馬溫泉既來頭:
有馬係日本最古老既溫泉，有馬溫泉含有環境省指定的9種療養泉成份中(單純性溫泉、二氧化碳泉、炭酸氫鹽泉、鹽花物泉、硫酸鹽泉、含鐵泉、硫磺泉、酸性泉、放射能泉)除硫磺泉及酸性泉外的7種成份，是世界少有的多成份含有泉。(.http://www.arima-onsen.com)
有馬既泉水有好多唔同既療效功能，例如神經痛、肌肉痛、關節痛、慢性消化系統疾病、血液循環不良（手腳冰冷)、慢性婦科病、月經失調等都有幫助。
除左住宿溫泉酒店外，其實都有好多人係選擇一日遊架，
因為有馬有公營浴場(公眾湯)金之湯呀、銀之湯，所以有好多學生哥，
同埋好啱一日遊既朋友試下咁。
因為知道有景點逛，所以我地約左酒店接送車4:30pm，
對下錶，仲有個半鍾，可以開始逛啦!!
由車站行出嚟就已經開始見到有幾間溫泉酒店，
再行遠啲就到一條橋同埋一個銅像，好似叫寧寧之像&寧寧之橋(譯音)，
係紀念日本戰國時代既名人豐臣秀吉&佢妻子，
經常到有馬溫泉療養而建立 (上網搵返先知)。
橋下面就係有馬溫泉公園，有休閒設施俾人坐下休息下，
聽聞初春櫻花時、冬天落雪時都係特別靚。
再往上走就會見到一排商品，主要賣手信名物。
有馬既手信名物就係炭酸煎餅啦~~~
小妹覺得好好食，所以買左唔少自己食同做手信，
又有好多種口味，又有有餡無餡任君選擇，
而且價錢唔貴呀! (已經食晒唔記得影相，哈哈!!)
繼續往上行就會去到金之湯啦~
出面有一排俾人浸腳既位置，我地去既時候剛好有一批日本女學生，
唔知係咪學校旅行嚟浸溫泉呢?
再往上行仲有幾間買食物既商店，雪糕、炸物都有。
我地行到餓餓地食左其中一間既炸豬扒，即炸好味道!!
如果再一直行呢就會去到銀之湯，
但因為Jim婆婆不能行太多路，所以我地就折返，
返去車站等酒店車接我地啦~
來到酒店，有幾位穿著日式和服既女服務員已經係門口等緊我地，
日本人既服務態度真係抵讚。
辦好入住手續後，前台職員就介紹了其中一位年輕和服女，
說係呢兩日負責我地房間既服務員。
然後她及另一位男服務生就提住我地既行李穿過樓梯、走廊、來到一條日式橋。
橋兩旁見到山景好美(上圖)，如果秋天紅葉滿山時更美!!
服務生介紹兩個戶外湯就係下面既秘境中，
聽完好期待，結果夜晚就去左一轉，
夜晚戶外湯只有我家包場，涼涼地真係超正!!
(因為浸溫泉無可能影到相啦~ 所以都係無相既!! XD)
左轉右轉終於嚟到我地既房間啦~
由於Jim婆婆老人家接受唔到同陌生人一齊"肉帛相見"，
所以特意訂一間有私人風呂既房間。
出面仲有個小庭院，企係庭院或者浸住風呂可以望到剛才日本橋既秘境風景。
呢次旅程就係為左呢個私人風呂啦，一次浸兩個人無問題。
有一面係對住庭院，不過附近只有一間並排既同類有私人風呂既房間，
仲要我地住果兩日都無人入住，所以私隱度係OK既，絕對可能放心浸。
凌晨時份，浸住風呂，聽住歌，望住山景樹林，
真係好好既放鬆同享受!! (懷念中~~~)
放低行李，周圍影相自拍下，又到左差不多晚餐時候。
我地安排左係房內享用傳統和式晚餐，一共九道菜式，擺盤賣相都非常精緻。
選擇係房內食呢係正確既，因為可以慢慢慢慢食~~
每道菜都好好味，尤其果幾件神戶牛，yummy!!
食到最後真係飽到上心口!!
食完晚餐休息一陣，我就先出動去另外兩個室內湯、兩個戶外湯浸下視察下環境啦~
戶外湯真係好正，係天然既所以硫黃味好重，
仲要太夜啦，包埸，正!!
之後當然返去自己既私人風呂再浸過啦~
總知就浸晒一年既份量啦，哈哈!!
Day 3 就係咁浸浸浸中渡過左啦~
睇到啲景都覺得relax
回覆刪除浸溫泉好正呀
回覆刪除