2016夏末大阪溫泉之旅 - Day 1&2 大阪心齋橋/京都清水寺/四条通

十月的時候安排了一次家庭旅行，
主要係想帶Jim婆婆去日本浸溫泉，
所以就去左轉大阪啦~

唔知點解近年去旅行都總會遇著打風，
而呢次就遇到「海馬」先生，
結果原本夜晚十點多的回程，
變成凌晨四點多，真係慘慘。



每次去旅行又要委屈少爺住幾日酒店，
睇佢今次好似已經認得果度既姐姐，
阿媽走時仲未表現唔捨得~

放低左少爺就立即趕去機場，
今次第一次搭香港航空去日本，
因為唔想Jim婆婆太辛苦，所以揀中午機。
So far 順順利利無咩delay，
去到日本關西機場再轉海南火車，
去到心齋橋附近既酒店已經晚上七點幾啦~
放低行李就出動搵食。
第一日安排去酒店附近食蟹宴。



呢間好近我地住既酒店，而且朋友去過話無咁多人，
比起道頓堀間蟹道樂少人啲，環間清幽啲。
果然去到可以直入房間，服務亦非常好。
食完慢慢逛返去酒店時見到一間"奸夫"專賣店喎，
可惜已經關門啦，之後幾日都無時間再行過啦~



Day 2
一早就去酒店附近既早餐店食個豐富早餐，
最緊要係杯咖啡!!
話說之後再去大阪都會嚟返呢度食個早餐。



食完早餐就出發去京都啦，今日打算去清水寺及金閣寺。
去到京都"馬尺"第一時間去買張全日任搭既巴士票，
咁就唔怕落錯車啦!! 因為可以即刻再等過一下班，哈哈!!
一日票記得好似800日元，但一程單程已經係230日元，
所以如果去多個一個點，就當然係一日票抵啦!!
而且唔使搵散錢，落車就無咁"論盡"囉~



第一站係清水寺。
嘩~ 多人到不得了。
沿路都見到好多女仕(有不同年齡啦)都身穿和服，
因為問左Jim婆婆無興趣試著，
又唔想佢等我地轉LOOK，所以我地都係無試。
不過太多人，就算著左和服影出嚟既相人山人海咁，
都唔荒靚得去邊~



之後就去左袛園食午餐，係好好食既鰻魚飯定食。
雖然只係好普通一間小餐廳啦，
加上可能我地都好攰，所以覺得特別好味~

第二站由袛園出發，本來想搵巴士站，
點知行下行下去左四条通，又原來好多野睇好多野買，
所以不知不覺行到四點多先發現，
我地仲有金閣寺未去呀!!!!



結果再搭巴士，去到已經係5:10PM囉，天氣都開始暗囉。
行下行下... 咿... 點解所有人都係迎面走過嚟既??!!
去到門口，謎底終於解開，就係金閣寺係5點正關門囉!!
所以我地只有係門口影左幾張相扮嚟過啦，哈哈!!



夜晚已經好攰，所以就返去心齋橋道頓堀食一蘭拉麵加章魚燒做晚餐啦!!

是日完結!!