少爺七歲生日

唔覺唔覺已經成大半年無寫Blog啦~
之前明明講左話要好好記錄自己既生活，
最重要係好好記錄同少爺一齊既生活點滴，
等之後睇返可以好好回味!!
雖然呢年生活不算如意，
但係還得要過，
所以努力補返認為值得記念既時刻!!

第一篇要補既當然係少爺既7歲生日啦~
(雖則下個月就到8歲啦~ 哈哈!! 所以要拿拿聲)

少爺生日當然要有生日蛋糕加大餐啦!!

話說生日既前幾天有段少插曲，
當時小妹果幾日病到瘟瘟燉燉，
10月5日係少爺既正日生日，
咁正常應該前一日就準備好生日蛋糕，
放冰箱雪一晚，第二日就可以慶祝。



點知我10月3日就整定，個心以為聽日就係。
當然10月4日先清醒返知道搞錯左。
咁蛋糕放兩日就唔好食啦!!
所以上年生日少爺有機會連續兩日有蛋糕食，
佢阿媽真烏龍 😂😂😂



呢個就係阿媽牌生日蛋糕啦~
個樣都呃得下人架 😅
當然"Birthday"既裝飾少爺唔食得啦，
Cream係Greek yogurt，個餅底就係整開既cheese cake囉。



而大餐呢，就係牛扒加雜菜，加隻蛋
(生日點都要食隻蛋既，雖然唔係紅，哈哈!!)
睇少爺個笑到見牙唔見眼既樣應該係滿意既~
少爺OS:搞咁耐，又要影嚟影去，究竟食得未呀!!??



話咁快JimJim已經就快踏入8歲啦~
真係唔認老都唔得!!
依定佢都瞓多左，無以前咁扎扎跳!!
加上呢一年都少左戶外活動，
養"豬"處休，以後可能都會keep住養生，
大熱天時既行山活動就免得就免啦，
以後就多啲幾小時既郊外野餐好啦~
至於游水嘛，當然盡力滿足下你呢隻水犬啦!!

Jim，請你都要愛護自己，努力養"豬"處休，
要好好咁陪媽媽有咁耐得咁耐啦!!!