台北溫泉Hea之旅2016 - Day 3&4 淡水老街/紅毛城/北投溫泉/返香港

2017.03.13 update ~
不得了，BLOG荒廢左好耐!!
入嚟發現2016年4月份既台北Trip最後一篇原來仲未POST~ 哈哈!!
寫左就照POST 啦，雖然過晒期!! XD

= + = + = 跳 回 Day 3  = + = + =

第三日嚟到呢個Trip既重點，
就係浸溫泉啦~

話說台灣最名既溫泉地點有北投及烏來，
Plan行程既時間有被烏來既郊外風景所吸引，
但係烏來比較遠，如果真係要去的話，
建議租車比較方便。
由於是次我地主要係搭捷運，
亦唔想Jim婆婆坐太耐車辛苦，
所以最後都揀左北投/新北投。



當日就係台北多區暴雨，桃園機場水浸個日啦。
我地係台北酒店出發前都有睇當地新聞，
仲話早上淡水老街已經水浸左一大半~
話說當日我地既行程就係先去北投溫泉酒店放低行李，
之後就會去淡水行街食街邊小食架嘛，
咁仲去唔去好呀!!!
結果去到新北投站既時間，雖然都仲有落微微雨，
不過已經唔係暴雨，所以當然係照去淡水啦~



行淡水老街既時間總算好彩，
唔使長時間都開遮，總算行得自在。
淡水真係比較鄉下Feel，
係老街見到幾隻鋪頭養既狗狗，
自由自在咁周圍行，一時又去呢間鋪頭涼下冷氣，
一時又去果間到攤抖下咁，
真係好舒服。
如果係大城市就一定無呢支歌仔啦，
唔係驚俾車撞，就一定會有人怕呢樣怕果樣啦!!

行下行下都食左幾樣名產，
牛角酥好香，紅豆餅熱呼呼，而且唔太甜，
好似仲有食幾樣野，不過無見相就係會唔記得囉，
仲要隔左咁多個月，真係咩都唔記得啦~ XD



一直行就去左個景點叫「紅毛城」，
應該係以前英國使節當時係當地既官邸，
環境非常清幽，影相一流，所以當日都見到好多情侶嚟影沙龍咁。



其實隔離仲有一座建築物(唔記得左係咩XD)可以參觀，
不過我地去到既時間都已經係五點左右，
已經關門唔可以入內啦，
所以如果有興趣既朋友仔記住要早啲去啦。

行到差不多黃昏時份，就去食晚餐囉。
由於突然又落大雨，所以只去隨便去左一間食PIZZA意粉既餐廳，
唔太特別就無影相介紹啦。



終於去到全程重點啦~
呢間溫泉「漾館時尚溫泉飯店」離新北投站遠一點點，
需要走一段5-10分鐘既路，但係環境就比較清靜，
唔會係正馬路旁邊。

我地預訂既係可以住四個人既房間，
因為中午時去到酒店仍未夠鍾check-in，
所以只係放住行李係reciption，
夜晚返來入房時，酒店已經準備好薑汁湯圓招待。
而且亦有一支紅酒、有氣礦泉水、水果等緊我地啦~
佢亦有咖啡機任飲。

當然行左一日要立即開溫泉嚟浸下啦，
話說北投既溫泉係含白硫磺，
所以流出嚟既水係少少奶白色，
同日本既黃泥色係唔同既。
呢個Size真係夠晒三至四個人浸都唔覺好迫。
其實呢間酒店除左有呢種可以係房浸溫泉，
亦有共用既溫泉區，因為如果二人房就好似無獨立浸缸啦。

當然台灣浸溫泉既感覺係同係日本浸既完全兩回事，
不過無咁多日假，去下台北浸下relax下都唔錯啦~

第四日，原本係下午機，
不過因為係新聞見到桃園機場係尋日發生既大delay兼水浸情況，
真係好驚第二日會唔會都仲未處理好，
因為已經第四日啦，落機仲要第一時間去接少爺，
真係不容有失，
所以我地早左出發去機場。
去到見到機場已經大致回復正常運作，
但係就無冷氣，真係熱到溶呀!!
不過能夠準時起飛，準時返到香港已經係好好彩啦~



就咁過左台北四天假期，亦因為掛住日本既溫泉，
十月份時就去左大阪友馬再浸過，
下篇就係十月大阪之旅 (希望我仲記得發生咩事寫得返啦~ XD)。