我家少爺Jim ☆ JimJim the Corgi ☆: 2023年8月初。京都大阪遊

5月時去左東京，心思思8月再去左京都、大阪。六日五夜。

Day 1 - 香港。京都

今次都係搭CX，航班預計3:30pm到關西機場，排隊過關等埋拎行李，最終要差不多4:30pm先去到JR站搭車離開機場。8月初新開左Haruka Express，可以由關西機場直達京都，所以今次就試下。Haruka Expres 車身＆車箱入面都充滿住 Hello Kitty，可以打卡影相。坐既人唔太多，坐位都好舒適。坐左大概1.5小時就到京都站。

會係京都留三晚，第一、二晚就揀左距離車站十分鐘既 Hotel The M's Kyoto。一般小酒店格局，價格中等，當時是暑假都只係＄1000左右一晚，我覺得幾抵住。

放低行李後，我地就返去JR車站附近搵食，其實已經8:30pm，好多餐廳都已經last order﹐所以選擇既餐廳唔多，最後揀左「とんかつKYK 京都ポルタ店」，係專食日式炸豬扒。我點左季節限定鯛魚+豚肉定食，即炸好爽脆！

Day 2 - 京都伏見稻荷大社。清水寺

呢日係觀光日。一早就出門去伏見稻荷大社，之前上網Plan行程時啲人話要避過人潮要晨早七點去到！七點！太誇張，我盡我能力九點去到，當然正常已經好多人。伏見稻荷大社出名有好多個紅色鳥居。行完可以行埋隔離既手信街。

之後就去清水寺，由伏見稻荷大社到清水寺大概半小時，去到清水寺又係超爆多人。今次係清水寺修楫完之後嚟，所以都要買飛入去打下卡。

Day 3 - 京都嵐山

今日要check out京都市既酒店，去嵐山住一晚溫泉酒店。今次決定要坐嵐山觀光小火車，所以由京都車站搭JR到馬堀站，行路到小火車龜崗站，然後就坐小火車到小火車嵯峨站（龜崗站→馬崛站→保津峽站→嵯峨站），因為係八月景觀主要係翠綠樹林，如果到九、十月換成紅葉景色應該很美。我地到左嵯峨站就穿過竹林，就到嵐山區，一路行都有好多餐廳、手信店等等。嵐山另一個景點係渡月橋，今次book既溫泉酒店就係渡月橋既另一邊。

今次住「京都嵐山溫泉花傳抄日式旅館」既「京都日式客房」，房內有私人露天浴池。溫泉酒店設計雅緻，check in 完進入酒店範圍就要除鞋放分配好既Locker，然後就可以去揀一套浴衣，都有好多款式和顏色選擇。然後就上房間啦～房間係日式混合西式，有個玄關位，空間十足。酒店除設有男女各一既大浴場，另外仲有五個不同設計既私人風呂，各有特色，只要無人使用就可以入內使用，唔需要另外預約，非常方便。浸完仲有免費既雪條任食。

今次都係揀一泊兩食，晚餐及早餐都係地下既餐廳享用。晚餐main course可選牛或鴨，飲品任飲，包括各種酒精類飲品。早餐main course可選日式／西式，另外出面仲有放題任拎﹐有好多種類(未瞓醒唔記得影相😆）。我覺得兩餐都不錯。

Day 4 - 京都、大阪

朝早食完早餐返房浸多陣溫泉就check out離開。返到大阪就去酒店Check in，放低行李就行去心齋橋。心齋橋同疫情前好唔同，好多小商鋪都變左大品牌連鎖店。藥妝店都仲有既。行下行下就去到道頓堀固力果招牌打下卡（呢度無變！）。本來想食蟹道樂點知Full左，咁就再行到去難波方向，最後去左高島屋9樓食日式定食。