我家少爺Jim ☆ JimJim the Corgi ☆: 2023年5月。初夏東京之旅

開關後既第一次東京之旅，總共五日四夜，今次既重點係富士山＆Shopping。

Day 1 －香港。涉谷。上野

落機入境都唔快，所以去到涉谷既酒店已經差不多4:30pm，放低行李就即刻去第一個地方 ---上野。上野既阿美橫町係買平野既好地方，藥妝、日常用品、綠茶零食都有，我就買左一堆藥妝＆零食。一場去到上野，當然唔止買平野，就係去食開業260年既鰻魚飯名店‥伊豆榮。上野有兩間伊豆榮，一間係上野本店（一橦七層大樓），另一間係上野恩賜公園入面。我今次去既係七層本店，鰻魚飯好食，亦坐得舒服，可以遠眺上野公園。

Day 2 - 木更津三井Outlet Park

第二日係outlet 血拼時間。今次揀左去木更津outlet，一早就出發到東京車站八重洲南口坐巴士。Outlet營業時間係10am至8pm，而巴士就由9：05分第一班，車程大概45分鍾﹐因為可直達outlet，所以揀左搭巴士，詳情可以上官網睇，特別提一下最好買定來回車票，咁回程就一定有位啦。我覺得呢個outlet都幾好行，一般常見既熱門牌子都有：Beams、Adidas、Nike、A.P.C.、X-girls、Montbell、Coach、帽子店... (呢d都係我有買到野既牌子 😆，未能盡錄）。

好羨慕日本人可以連埋狗狗行outlet 💕

木更津outlet官網

行完outlet返到東京車站可以到地下既手信街睇下。呢日既晚餐係之前已經係Klook訂左俾左錢既日式燒肉店（唔開名因為唔推介！），都係涉谷，所以就返左酒店放低戰利品後再去餐廳。講開呢間燒肉，我就唔會推介！肉類既品種少，賣相麻麻，而且通風系統麻麻，90分鍾放題，食完成身好大陣味，不過佢又唔係無人幫襯既，而且大部份都係日本人，所以只可以話同我預期有落差，試過就算。

Day 3 - 新宿

第三日預左去食梅丘美莉登，因為無訂位所以諗住未開門前（11點前）去拎飛排隊，10:30am去到已經好多人，排到24號了。大概等左1.5小時終於到我地入坐。其實美莉登已經係香港有得食，不過朋友話日本既好食啲，所以試下。咁當然係日本既係新鮮啲、時令啲，不過下次都係要事前book定會好啲。

食完之後就搭JR到新宿shopping啦～今次去新宿發現好多以前勁旺既商場都變左，有啲變左夾公仔場，有啲變得好冷清，好多以前有買過既日本牌子都好似消失左。今次呢次旅程反而係outlet係買得最多野，大商場只係買左少少。

是日晚餐「地雞炭火燒」。呢間餐廳用既雞係由自己既農場養既，品質可以做雞刺身！當然我唔夠敢食刺食啦，佢既鐵板炭火燒雞都好好食，啲雞係用炭火薰煮然後放係鐵板上，雞肉係剛剛熟，非常juicy，又加上有炭香味，送啤酒真係一流。重點係價格非常親民！

Day 4 - 河口湖。大石公園。富士山。忍野八海

第四日可以話係今個trip既重點行程。呢日參加左one day tour 去河口湖、富山士等景點。因為如果要去呢啲景點一係就要自駕、一係就要搭車又搭船轉幾次先到，所以其實參加呢類 one day tour方便好多，仲可以一日去幾個景點！今次我係出發前係Klook預先訂定俾晒錢，當日於指家時間到指定地點集合，全程坐旅遊巴，有講國語（當然識日文）既導游，導遊會係旅程中講解景點既資料╴又會打點買飛排隊等事，仲包埋一餐午餐，而且預訂時已經係網上俾晒錢，當日亦唔需要再俾導游小費之類，只係按個人需要負責自己既消費，例如買下紀念品、小食等，真心覺得幾好。

當日7:45am係新宿西口集合，等齊人就搭旅遊巴士向河口湖進發。當日既導遊小姐係一位已嫁到日本生活了幾十年的台灣女士﹐所以佢大部份時間都係以國話向我地溝通講解。團友大概20人左右，有台灣人、香港人、韓國人和一對外籍母子，所以有時導遊都要用google translate嚟同韓國人、外籍母子溝通。

坐了大概一個半小時就到達河口湖準備搭吊車上山，在吊車中看到河口湖全貌，風景優美。山上好多打卡位，有個地方可以俾錢坐「秋迁」，工作人員仲好好幫手拍片影相，我就無玩啦～山上逗留大約一小時就返到河口湖畔，係旁邊既餐廳食午餐。午餐係當地傳統食物刀削麵，份量剛好（對女士來講😁），味道也不錯。

午餐之後，大家就返上旅遊巴向下一站大石公園出發。大石公園離富士山又再近一點，天氣好的話係可以睇到富士山既全貌，可惜當日天陰多雲只見到一半。大石公園出名薰衣草雪糕，試了好食。而且係公園門口有一個小攤檔買水果，我地買左淡雪、士多啤利、白桃，價格比超級市場平，而且好甜好香，抵食！

上車離開大石公園，終於向富士山進發。今次既目的地係富士山五合目（2305m），到達五合目立刻感受到寒意及霧氣（大概2度），係五合目仲有一間旅館餐廳、寺廟、紀念品店。其中一樣吸引我既紀念品係富士山之空氣，我無買呀，唔知係咩味既呢？😆 留左大概一個半小時之後就離開，但司機叔叔(日本人)非常好，見我地仲未見到富士山既全貌，開車離開中途特別係四合目景觀園停了一陣，終於見到稍微露面既富士山！！

最後一站係忍野八海。由富士山開車大概一小時就到達。
忍野八海是位於山梨縣忍野村的湧泉群，包括了出口池、御釜池、底抜池、銚子池、湧池、濁池、鏡池、菖蒲池，來源為富士山融化並經過80年過濾的雪水，為國家指定天然記念物、名水百選、新富岳百景之一。（摘自維基百科）
呢個景點真係好靚，好多打卡位，果度仲有一群商店，買小食，紀念品等等。當地出名係豆腐、豆漿。試左豆漿，係無糖既，umm...唔太合口味～

可能因為之前景點交通用多左時間，所以呢個最後景點只係留左半個鐘就要走啦！由山梨縣開車回程新宿西口，到達新宿已6:30pm。是日晚餐係日式火鍋放題(唔記我叫咩名)，抵食好飽。

Day 5 - 涉谷。香港

話咁快就嚟到最後一日，下午就要返香港啦！所以呢日都係留係涉谷行下週邊既商場。新商場宮下公園地下係「涉谷橫丁」美食街，頂樓就係公園，仲有多拉a夢佈景打卡。另外，酒店對面既PARCO有好多名店，附近街鋪就有Disney store、Tokyo Hands、ZARA、Loft等等，行到差不多就出發去機場。