［敗］Panasonic 全自動麵包機

最近Panasonic 既自動製麵包機終於係香港有得賣啦~
雖然只得一個model, function 亦只有13種 (8種麵包、3種麵糰、2種點心)，
比起台灣最新既models有30種function 仲差一截，
不過起碼唔使轉火牛，用預約功能插住個火半一晚／日都會覺得放心D....

其實買麵包機既念頭都係近日先興起，
因為睇到台灣BLOG友既敗物文，
再詢問身邊朋友發現都有人買左，評價也不錯。
我跟家人都係好鍾意食麵包既人，連我家少爺Jim 在內！！
但少爺Jim 只可以食白麵包，加上擔心太多糖份／鹽份／牛油，
所以都不敢俾佢食咁多。
就算係人，依家既麵包唔係太多防腐劑化學品，
就係發到好似空氣咁，仲要唔平架喎！！

所以我就用左幾日時間做下功課，上網search 下，睇下人地既BLOG，
最後就帶左呢台 Panasonic SD-P104 返屋企啦~~

之所以買Ｐ牌係因為大部份既台灣BLOG友都對佢讚不絕口，方便、使用簡單。
而且佢有獨立自動投入酵母及乾果既功能，比起其他牌子要人手投入方便好多！
價錢則比日本象仔牌平Ｄ，不過佢就無保溫功能，
做完既麵包要短時間內倒出，不然就有水珠影響包既質感。
size 方面，比熱水壺大少少 (相片可見係矮過JimJim 既 !!! )，
每次可以做到一磅麵包。

不過都幾重 (本人因為心急唔想等送貨，所以自行拎返屋企，二頭肌訓練都真係唔講得笑!!）
即日買齊材料，準備開機！！

第一個成品係「核桃全麥法包」



因為太心急無睇晒說明書就開機，
於是唔諗下自己係第一次做(!!!) 就揀左法包。。。
足足等左5個幾鍾耶！！(真的有夠耐！！）
不過成品尚算ＯＫ，外面稍硬，內裡較棉棉~
因為「法包」function 係無得揀顏色，所以焗出黎既色唔知算唔算太深呢?

第二個成品係「抺茶核桃麵包」



無錯～今次係普通麵包，只需4小時！！
成品外表幾good，質地都係較棉棉，不過就唔太覺得有抺茶味 。
應該係落抺茶粉太少，連色都唔多覺。。

第三個成品係「乳酪核桃麵包」



呢個食譜係網上論壇搵到既，味道不錯，外表都好good~
食落有淡淡既乳酪香味～

= + = + = + = + = + = + = + = + = + = + = + = + =

綜合以上３次經驗，本人覺得呢個麵包機確係一個偉大發明！！
只要將材料倒晒落去，按幾個鍵，等幾小時就有自家制香噴噴無添加麵包，不得了！！
剛剛焗好時，真係好好好香～

比起以前又要搓麵粉搓到手軟，焗既時候又驚時間控制唔好要昅實，真係天堂地獄既分別。
我做既麵包都係走鹽、少糖、少牛油，每次都有分少爺食，
佢非常之喜歡 (雖則基本上所有食得落肚既野佢都喜歡架啦～)，
當然佢只係分得少少，不過我就俾得放心～
缺點當然有啦～　
就係價錢都唔係話大眾化，
朋友話要做多過150次先回本(唔知佢點計?!)，
我依家每日都做一個，咁即係唔使半年就回本啦！！

不過。。。未計材料費。
材料費都係唔平，不過就係真材實材！！仲想加咩材料整咩口味都自己話事！！
老實講，依家一Ｄ比較高檔有質素既麵包閒閒地都要over $15，仲要得4片，
計起黎其實同自己整都差不多價錢。

另一方面就係又要搵個地方擺，大家知香港既廚房細到呢。。。
絕對同外國超級無敵大既廚房無得比，要安置好佢都要花Ｄ心思！！

= + = + = + = + = + = + = + = + = + = + = + = + =

不過本人申明立場，我並 不是 勸導大家去買呀！
有無需要真係好睇你本身喜唔喜歡食麵包，喜唔喜歡自己整下唔同口味，
我都知道有人買左都係用左十幾次就封塵，
所以係唔係值得買就要諗清楚啦～　

我會努力製作，起碼要回本先啦~ 哈哈!!
希望下次有新口味更新分享!!