鮮食分享

之前既BLOG都有提過JimJim逢週末/日都係鮮食日。
每週只有一日其實係因為佢阿媽太懶!! 哈哈~

如果要每日2餐都係鮮食，每次整定幾日份量，個雪櫃又唔夠位!!
仲記得曾經試過煮多D，放入雪櫃，第2次就攞出黎加熱，
唔知係我加熱唔夠，定係JimJim 腸胃麻煩，結果有輕微肚潟既情況出現，
自此之後，我就唔敢再整定幾餐加熱，而係次次即做即食。(攤手~)


我認識「鮮食」係源自台灣哥基飼主既BLOGs，
唔只一個，係好幾個。台灣既哥基飼主都好有心，有好多養哥基既心得分享，
睇到佢地既經驗同分享都認為鮮食對自己既毛小孩有明顯既好處，
當下我就好想去了解究竟「鮮食」係一個咩既概念呢? 係咪真係好既呢?
因為如果係好既，又適唔適合我家少爺呢?
現今資訊發達，好多資料都比幾十年前容易搵到，於是我就上網做功課。
而且現時關於狗狗既書亦比以前多好多，亦有去書局睇下有無相關既書籍。
今次想分享既並唔係我既經驗 (因為都無咩可以分享) ，
只係介紹兩本關於狗狗天然飲食既好書俾大家!!

《狗兜裡的學問 - 狗狗營業大全》
作者: 陳善淇獸醫
出版社: 經濟日報出版社



其實呢本書唔止講鮮食，亦有講解飼料成分點樣睇，點樣計算你家狗狗需要既分量。
由於好多飼料都係由歐美國家生產，
好多時佢地建議每日既飼料分量都係以外國狗狗既活動量而定，
對於亞洲國家既狗狗 (普遍較少活動量) 有可能出現過量既情況，久而久之就會導致肥胖。
以我家少爺食開既狗糧為例，佢既建議食用分量係每日2杯 (!!!)，

如果真係按呢個分量既話，我諗JimJim已經變左一隻大肥豬!!! 不得了!!!

根據書中解說既卡路里 (Kcal) 計算公式:
「蛋白質比例 x 3.5 kcal/g + 脂肪比例 x 8.5 kcal/g + 纖維比例 x 3.5 kcal/g + 碳水化合物比例 x 3.5 kcal/g 」

按飼料成分既比例計算，每100g就含有372 Kcal，
以少爺既體重及每日運動量只需大概760 (減肥情況) 至1,020 卡路里 (正常情況)。
因此少爺其實只係需要200g 至 250g 既分量。

我都係按呢個分量再扣除日常零食既分量(Kcal) 俾少爺食。目前體重管理尚算OK!!
呢本書亦有提到不同年齡、多種疾病 (如心臟病、腎病等) 與營養學及飲食既問題，
亦有案侈解說，我覺得係比較容易掌握既書。


《狗狗的天然飲食書 - 健康鮮食料理的實作秘訣》
作者: 美樂狗．千金爸
出版社: 博誌



而呢本書係台灣出版既，主要講鮮食既概念及應用。
我覺得係進階版既狗狗飲食指南，包含實行鮮食之前必須要有既概念，
例如什麼適合狗狗吃?
什麼絕對不能吃?
怎樣吃才有均衡營養?如何計算鮮食熱量?
諸如此類.....
書中亦有不少案例解說，亦有提供不同食物既營養，資料非常齊備。

= + = + = + = + = + 讀 。後 。感。= + = + = + = + = + 
其實睇完呢兩本書之後，本人係認同鮮食概念的，
但係要實行完全鮮食並唔係一件簡單既事，
飼主必須要有充分既理解及智識去分辨及選擇。
絕唔可能任憑飼主喜好就隨便改以鮮食代替狗糧，
一個唔該做成狗狗營養不良或因缺乏某種營養而有病就得不償失!!
真係愛佢變成害佢啦~

誠如書中陳善淇獸醫所言，無論選擇鮮食或是購買已製成既狗糧，
最重要既因素是取決於主人願意或容許付出既時間及心機。
而且，狗狗活到十四、十五歲，一生只吃狗糧而從不需要看獸醫的例證亦不少。
相反，如果鮮食每每只係曇花一現，而且弄得狗主疲於奔命，
更甚狗狗會因此而挑食，效果就適得其反了。
(好在我家少爺對食咩無太大執著，對有無得食至係佢最大既 concern !!)

當有一日我能夠付出更多時間照顧JimJim既時候，
又或是當少爺老左有呢個需要，
就係我家實行全鮮食既日子啦....
JimJim 依家就將就下先啦~


(以上純粹個人分享~)