復活節假長征

呢個復活節假期一早已經安排好家庭樂3日2夜離島行，
點知。。。期待已久既日子終於來臨~
一齊黎湊熱鬧既仲有陰天、雨天、同風先生，太陽伯伯放假去了~
不過，陪少爺去玩少少風雨係嚇唔到我既!! 一於無有怕，照去!!

總括3日假期，1日落足全日雨，總算有2日係陰天間中有雨。
雖然雨天出遊玩得唔盡興，不過見到JimJim既燦爛笑容，真係覺得無來錯呀!!
今次既主要節目係行山，仲去左萬宜水庫東霸、世界地質公園到此一遊添!!
因為今次係幾日既相，所以比較多，一次過post 晒佢!!

= + = + = + = 出。發。囉。 = + = + = + =

JimJim好鍾意搭船，一聽到有得搭船船簡直係未出發先興奮~



因為已經唔係第一次去，所以JimJim已經好自在，亦好合作咁俾我狂影相。



呢張 "吹吹海風" 係咪好有Feel 呢 ~



行山既路線主要係行西貢萬宜路(麥理浩徑1段)，
途經白腊灣，再到萬宜水庫東霸既世界地質公園火山區，
然後折返，來回足足用左4個多小時。
沼途既風景非常之靚，邊行邊欣賞，加上陰天有風，其實都好舒服。



JimJim今次係第一次行咁多路，佢全程都要keep住做第一名，真係辛苦死佢阿媽我。
而佢就一D都唔覺攰，其他人落後左，佢先會坐低趴低抖抖，真係精力充沛!!



途經白腊灣，有一大片草地，但係亦都有好好好多牛屎呀!!
我估如果唔係有上繩，JimJim有可能已經衝左去草地到嚕草加嚕牛屎 ，
後果真係唔敢想像。



穿過草地，就會見到有個水清沙幼既海灘，JimJim一見到就衝落海!!
因為有幾個人係沙灘扎營，亦有2隻大型犬，所以我都唔敢放繩俾JimJim free run。
不過佢有得衝落海濕左半個身已經好開心
夏天一定要再來，俾JimJim 暢快咁游水!!



沿住萬宜水庫路繼續前行，再行多1個小時就去到萬宜水庫東霸 。
由東霸望過去就會見到破邊洲  (就係JimJim身後裂開兩邊既小島!!)



沿住東霸行就會見到「中國香港世界地質公園」既標誌石啦。
當然要影張"到此一遊"既相啦~



再行過去就會去到浪茄，當日我地有大有細有老有嫩有人有狗，
再行就起碼要多1個多小時(單程)，所以無再向難度挑戰，選擇折返囉~



西貢真係香港既後花園，環境優美，空氣清新，沿途仲有好多牛牛添 !!
放假去呼吸下新鮮空氣，真係人都 relax D、醒神D !!