少爺初嚐自家製月餅

各位，中秋節快樂呀!!

今日係農曆八月十五日，係中國人既大節日，
傳統大家都會一家人賞月食月餅。
因為一向都無買開少爺食得既月餅，
今年心血來潮不如就自己試下整啦~
 
上網搜尋左好多狗狗既月餅食譜，
研究一輪，就去買月餅模、材料啦!!
 

月餅模係上海街搵到，
個度有好多專門賣模具、蛋糕用品、材料既鋪頭，選擇非常多!!
我買既模係細size既方型，仲有四個唔同既圖案。
月餅模仲有好多唔同形狀，好似心形、PoonPoon頭等等。
 
月餅餡我用左南瓜、紅蘿蔔。
做既時候先發現南瓜唔太適合做餡，因為會出水，
所以餅皮包住好容易變成太濕而破爛!!
唯有快手快腳包完D餡，放入模內壓成形。
所以如果再做，我會用紫著、薯仔等等做餡效果會更好!!
 
食譜做法如下:
 
~餅皮材料~
低筋麵粉  --- 240g
橄欖油 --- 40ml
水 --- 適量
蛋 --- 少許
餡料: 南瓜、紅蘿蔔 (蒸熟搓難放涼待用)



~做法~
1. 預熱焗爐200度20分鐘。
2. 搓好餅皮、包入餡料、放入月餅模壓成形。
3. 第一回200度先焗15分鐘，取出塗上蛋汁，再焗20分鐘至金黃色即可。



登登登登!! 完成品出焗!! 賣相都可以啦~



當然有請專人試食啦~~
入面又紅又黃，色彩都唔差架。
少爺好期待既表情!!



總結今次第一次做既效果都算成功既~
不過因為包餡既時候唔識預要幾多粉團，
所以個餅底部份都明顯比較厚，
食既時候都要再分少塊，以免JimJim啃親。

今年可以同JimJim一齊賞月食月餅啦!!