少爺泳季開始啦~~

距離上次出遊已經係4個月既事啦~~

呢段時間小妹工作超忙，
而且天氣潮濕 JimJim 要返汪星(?) 休養，
所以一直閉關無得出去玩!!

熱辣辣既夏天終於到啦~
大家知我家少爺係水犬啦，
夏天游水簡直就係狗生大事嘛，
所以擇左良晨吉日，
隆重宣佈~~~~ 少爺既泳季開始啦!!!!!!!!!!

就呢個復活節假期去西貢秘密花園上游泳課囉

星期五個日成28度非常適合暢泳，
少爺一見到水就已經自動波衝埋去啦~



認真游返幾轉先~



今次帶埋少爺新買既私家遊艇去玩，
唔好問點解係粉紅色 Hello Kitty (??!!)
因為佢阿媽覺得粉紅色靚囉!! 哈哈~

起初 JimJim 唔習慣成個坐上去，
自創左呢個 Jim Style



不過咁趴法睇佢又幾舒服架!!
對短腳"long"住咁，都不知幾嘆~~
你睇佢眼神簡直舒服到想訓個靚覺先呀!!



趴左一陣習慣左，終於正常咁坐返係隻艇入面，
仲要唔使媽咪扶住都唔驚啦!!



就係咁浮下浮下完成左2014年既下水禮!!!

游完水洗完白白晒下太陽殺下菌。
擺返個 chok 樣先!!



不過坐坐下太攰啦，頂唔順變左咁



第二日游完早水再行一陣山先返屋企，
少爺要抖多足足一日先回覆狀態，
係疲倦與休息之間就過左呢個復活節假囉~~


 [18-19.04.2014]