自家口味 Muffin

又來一篇整野食既文章充撐下囉~

事源小妹好鍾意食 Muffin，所以就好鍾意整 Muffin  (咩邏輯??!!)
今次就來分享下我自家製既 Muffin 啦～

其實 Muffin 既口味可以係無限多，
鍾意加咩都得，隨手有咩生果都可以加，
Blueberry，香蕉，紅菜頭，朱古力，咖啡....
我最常整既就係Blueberry同紅菜頭。



材料：
低筋麵粉　 150g
雞蛋　 　　1個
橄欖油　　 20g
糖                 15g
低脂忌廉 　50g
藍莓 　　　適量

做法：
(1) 預熱焗爐200度待用。
(2) 雞蛋用打蛋器打勻，加入忌廉拌勻。
(3) 篩入麵粉打勻。
(4) 加入橄欖油，加入藍莓拌勻，倒入muffin 杯至6成滿。
(5) 200度焗20分鐘 (時間視乎焗爐本身火力)。



係咁既，以上材料份量係少爺專屬版本，
但每次都只會俾1個佢，咁剩低既點算呢??!!
如果以呢個材料份量俾人食的話，就未免太＂清淡＂啦!!
不過當然唔會浪費啦~
所以呢，我通常會做好呢個材料份量既粉槳，分出1小杯預留俾少爺。
另外，用雞蛋一隻，糖20g，牛油(已熱溶) 20g，泡打粉3g用打蛋器拌勻，
加返去之前剩低既粉槳，再打勻就變成人食既口味啦!!



如果係用紅菜頭，就要先將紅菜頭蒸熟再用攪拌機打成蓉，
篩入麵粉前加紅菜頭蓉先拌勻。

其實除左唔同材料做出唔同味道，
Muffin亦可以加唔同既topping，
增加味道口感。

少爺知道呢個樣既muffin 無佢份，
以無視既態度表達佢既不滿！！哈哈～



呢個做法係小妹改良後既，
因為唔鍾意太甜，又怕牛油多太肥，
又想顧及少爺感受，加加減減之後既結果。
而且呢個應該係最簡單既做法啦，
啱晒我呢D又懶又怕麻煩既人。