我家少爺Jim ☆ JimJim the Corgi ☆: 台北溫泉Hea之旅2016

一拖再拖既台北遊記終於出籠!!
寫BLOG先發現已經係兩個幾月前既事啦~

話說呢個台灣之旅真係有驚無險!!
去左四日，第一日台灣東北部海域7.2級地震，
好彩係台北完全Feel唔到。
第二日，當日溫度38.2度，係台灣今年最熱既一日。
第三日，台灣多區大暴雨，桃園機場變成水塘，空中陸地交通大混亂。
幸好我地唔係當日返香港。
結果第二日機場大致回覆正常面貌，如期返到香港!!

當然出發前又要委屈我家少爺去酒店住四日啦~
四日好快返啦~ (抱緊!!)

= + = + 台北之旅正式開始 + = + =

今次係第一次搭香港航空，整體感覺幾好。
佢既芝士腸仔包都幾好味 (XD)。
當日搭0910航班出發，唔使兩小時就到達台北桃園機場啦!!

到達機場之後一出海關就會見到兌換店，
其實兌錢有好多選擇，一係ATM直接提台幣(好似要係銀聯卡)，
一係就去到西門町附近既大型銀行，因為個匯率好似好啲。
但我怕麻煩，所以就係機場換左算啦!!

跟住就去買張wifi卡，呢個年頭無得上網搵路及whatsapp真係超唔方便，
所以一定要買左先 (XD)。
出海關後大約有兩間電訊公司既counter，
不過因為一早聽朋友講上網用中華電訊個network會比較快，
所以唔使急於買，出到去接機大堂先搵中華電訊counter都未遲。
仲有其餘兩間都係較多人用(台灣大哥大、遠傳)。
但係提議係機埸買唔好出到去市區先，
因為機場先會有平啲既幾日package專俾遊客用。

搞掂晒之後少不免去接機大堂既地標 (吹歪左既紅綠郵筒)影返張check-in 相啦!!
跟住就去搵客運巴士搭車去酒店啦。
今次我地住既酒店係西門町，所以要搭1819客運，
係台北火車站落車再轉捷運到西門町。
其實有其他車直接到西門町附近既，
不過就要睇下近唔近你book既酒店啦。

到左台北車站之後，由於之後幾日都唔會再有時間嚟呢度，
所以順路到車站入面既微風商店街買埋手信。
個到可以話有齊較出名既台灣名物，一次過買晒好方便。
結果一袋二袋"論論盡盡"咁到達酒店。

今次去台北會住兩間酒店，
一間就係呢間位於西門町新開無耐既型格酒店 - Roaders Hotel 路徒行旅。
佢應該係走時尚風，target 年輕人。
因為 front desk 個層好似啲 hostal 既common room 咁，
有無限汽水杯麵供應，亦有娛樂設備如table soccer、電視、點唱機等。
房間內亦有樽裝水、即沖咖啡包、茶包，非常大方 (可能因為是試營運階段)。

今次入住的是三人房，一張雙人床及一張單人床。
房間有三分一是廁所沐浴間、仲有一個大浴缸!!
我諗由於三人房多數住客係一家三口，
所以房內有個小帳篷，小朋友一定喜歡。
最重要係房間空間大而且有窗，一啲都唔焗促。

放低行李稍事休息之後，就出發去第一站 - 上引水產，
我地由西門町搭捷運到行天宮站再轉小黃。
因為已經三點多，非常肚餓。
我地去左立吞區食壽司，非常新鮮。
話明立吞區當然係要企，不過台灣人都真係好貼心，
攞左張櫈俾Jim婆婆坐，咁就可以慢慢食啦~

其實上引水產還有燒烤區是設有座位，
另外仲有一間現揀海鮮現煮既餐廳叫「煮海」，
本來想試，但係因為食完壽司都有啲飽，
加上下一站係師大夜市，所以要留肚掃街!!
下次嚟應該會試「煮海」。

跟住就搭小黃直接到師大夜市啦~
當然要試下好出名既「燈籠滷味」啦，不過人多要等20分鐘左右。
仲有「許記生煎包」真係多汁好味，必食。
另外買左紅豆薏仁糖水，一般般。
其實小妹好喜歡飲台式飲品，所以個幾日一定每日至少兩杯~~ XD

途中見到有一間賣菠蘿油都好多人排隊，
但係小妹又覺得唔係咁吸引，所以就無排隊試啦~
師大夜市仲有買衫既鋪頭，買左一件外套加一件上衣，收穫OK!!