自家私房意國菜 (p.s.掹車邊簡易版!!)

上篇提到煮左一餐私房簡易版意大利餐 (掹車邊算係啦~ )，
有 Le Creuset 加麵包機幫手，總算豐富易煮既一餐，好滿足!!

先來介紹一下當晚 menu:
凱撒沙律 with 抹茶黑芝麻扭扭包
芝士什菜焗磨菇
蕃茄風乾火腿水牛芝士Pizza
牛肝菌意大利飯

麵包上篇介紹左就唔再多講啦!!



凱撒沙律就係去街市買沙律菜、車厘茄、麵包粒撈埋一齊，
食既時候再加 Parmesan cheese 及沙律醋.... 攪掂!!

重點係沙律菜我係去中環街市後面既菜檔買，
有好幾種菜選擇，差不多檔檔都係一樣價錢 (HK$28/斤)，
俾起supermarket 平好多，又多D種類。
亦有D係切好既什錦沙律菜都係差不多價錢，
無咩特別喜好既，就可以買切好既，返去浸下洗下就OK!!
小妹亦特意買左支沙律醋配食，
點知....
Jim婆婆話太酸，佢都係鍾意傳統食肥人既沙律醬喎!!!



焗磨菇都係好簡單，將蕃茄、西芹、甘荀、洋蔥切粒，
將什菜先放水滾一下(因為我怕西芹及洋蔥太生)，
放上磨菇，再灑上 Parmesan cheese 放入焗爐，
180度焗10分鐘就OK。
我建議放1-2湯匙水係盆底，咁焗出來既磨菇感覺無咁乾。

磨菇我都係去中環菜檔買既，
呢隻係HK本地種既磨菇，
唔同supermarket賣既多數係New Zealand 出品，
所以亦都比 supermarket 平好多，
我呢2隻只係HK$15咋!!
So far 我覺得質地無咩大分別，
不過就一定唔係有機勒~



經過呢次自家製 Pizza之後，愛上左!!
覺得易做又好味!!
不過易做係因為我有麵包機幫手，
用「麵團-薄餅」，"叮"一聲就做好左個麵團。
我建議先做麵團再開始做其他 preparation，
咁麵團就有多D時間發酵，做出來既 Pizza 底亦會滿意D。

因為我家只有20cm round，無 buffet casserole，
所以我就用20cm round 煎完直接入焗爐，
真係覺得LC又一好用之處就係可以直接入焗爐，
因為佢係鐵鑄，傳熱快而均勻，
整 Pizza 時可以充當 pizza stone 既作用!!

蕃茄醬材料包括新鮮蕃茄(4個)、蘿勒(2茶匙)、百里香(1茶匙)，糖鹽(適量)。
LC 塗上橄欖油，鋪上Pizza 麵團，再鋪上風乾火腿、水牛芝士，
用明火煎一下 (中火4分鐘) 再放入焗爐 (200度15分鐘)，
完成既餅底又香又脆，好好味!!

今次之後應該會繼續整自家 Pizza，
仲特意淘左個Pizza 砧板!!
可能遲D會多一個Pizza 狂熱既分類，哈哈~



至於最後既牛肝菌意大利飯，睇包裝就知係現成啦~
不過最難煮都係佢，要加水後不停攪拌以免粘底，
因為小妹係第一次煮意大利飯，
落水既份量唔係掌握得好好，先後加左幾次水，
好彩成品既味道無因此溝淡左，
依然有濃濃既牛肝菌味。

聽說牛肝菌係貴價食材，
我呢包有機牛肝菌意大利米盛惠HK$52，
有牛肝菌味，又係有機米，真係唔錯。

呢晚 Italian dinner 大概HK$350有找，夠4人食飽飽，
而且有D材料係一次無用晒，例如沙律醋，芝士等，
我就覺得好抵啦!!

今次因為時間唔夠，下次再來會整埋個南瓜湯，咁就完整啦!!
(呢次無湯陪麵包，攪到麵包格格不入咁!!哈哈 )


以上，分享完畢。