2016元旦大滿足之旅

終於有時間寫2016年第一篇BLOG啦~
雖然一月已經過左一半啦，不過點都要.....
祝各位BLOG友2016年事事順利，身體健康!!

2016年元旦假期，Jim家終於可以去秘密花園渡假啦~
今次都係揀坐船船，少爺最愛啦~
點解今篇要叫「大滿足之旅」呢?
請各位耐心睇埋落去就知架啦~


= + = + = + 跳 回 假 期 + = + = + =



果幾日每日既天氣都有明顯分別，
首先第一日天氣好到不得了，大太陽，溫度差不多20度!!
第二日就明顯涼左，第三日就不停落雨啦~~



仲記得三年前(!!!!) 都係元旦假期去渡假，
仲要係少爺第一次過夜之旅 (重溫「大個仔2日1夜離島遊」)，
轉眼已經三年啦~~
講返天氣，我係想講三年前既元旦我係要著大褸既，
點知今年只係著薄長袖衫已經OK。
其實... 講咁多都係想講... 天氣「熱」到... 有狗以為就可以游水囉!!
又... 佢阿媽我一時心軟... 俾狗得逞!!!! 唉......



你睇少爺個樣，根本就係一開始已經打算游水水!!
本來我係堅持怕冬天游水冷親，
你睇下連圍巾都無除架!!!
點知....少爺居然發出「嗚嗚聲」以示不滿，
俾阿媽拒絕一次之後，
少爺採取以退為進，撻係地再加大呼吸聲，
為表示佢好熱，就嚟熱死，仲唔俾落水涼快!!!
唉.... 最後... 咪就係「慈母多敗兒」囉~~



有得落水既少爺幾得戚呢!!
真係唔俾個影帝佢都唔得呀!!



其實主要係怕少爺會冷親，不過好明顯係怪獸阿媽攞嚟擔心!!
所以見到少爺咁開心既樣，
雖然野外(!!)洗狗好凍凍，但都心甘情願。
不過都好彩第一日俾少爺游到夠，
第二日又涼左，所以第二日就唔俾落水啦!!



無得游水咁就去行下山，散下步囉~
其實涼涼地既天氣真係好適合行下山。



又或者去碼頭釣下魚，吹下海風!
少爺話好寫意舒服呀!!

所以呢...今次元旦之旅最大滿足係咪係少爺先啦~
居然1月份都仲有得游水!!
全球天氣反常變暖，可能遲啲游水水應該全年無休。
大家真係要對地球先生好啲啦~



最後笑騎騎既少爺(咁押韻!!)再祝大家Happy 2016~~