[敗] GoPro Hero4 游水水新物

之前買左Canon 100D 就係為左同少爺影多D靚相，
果然影出黎既相唔太要後期加工已經可以睇得下。
但係用100D影movie就好似唔係太方便，
始終相機"大舊"又聚手，最最最大問題係唔濕得水。

由於少爺最愛游水，而且游水時真係太太太可愛啦~~
(阿媽覺得自己阿仔係最靚仔最可愛既不治之症又發作啦~~~)
所以一直都想買可以拍片又防水既action cam。
GoPro 應該係action cam入面既專業，不過始終唔平，所以一直都下唔到主意。

點知.... BLOG友冬冬入手左，仲拍到好多Kawaii 既片，
小妹我立刻失守，趕係同少爺去夏令營之前敗返嚟!!!
(所以話朋友唔使多，一兩個夠"毒"就夠啦~ 哇哈哈!!!! XD)



GoPro 已經出到 Hero4 啦~
分Black 及 Silver，主要分別係像數(Black 高D)，
同埋背後有無Monitor (Black無、Silver有)，價錢亦相差一千蚊。
對於我呢D業餘用家，像數要求唔一定要最高，而且有Mon可以知道自己影緊咩，
所以就揀左 Hero4 Silver 啦~

其實部機都唔係太貴，小妹覺得D配件先真係貴啦~
但係淨機唔買配件當然唔可能啦，所以就入手左三件配件，
分別係伸縮棍、手帶、狗背帶。
(由於狗背帶要訂無現貨，所以趕唔切帶去夏令營，要留待下次再試玩啦!)



有朋友教我去淘寶淘A貨配件，但係做下功課發現，
A貨配件係陸地上用(唔濕水)都還可以，但係濕水隨時有入水問題，
成幾千蚊部機為左慳百幾蚊而壞左就真係得不償失啦!!

其實GoPro 除左可以影movie，亦可影相 (單張及30連拍)。
本篇第一張相就係GoPro 影架啦~ 好有廣角Feel!
而且像數係1080hp，顏色都幾出 (下面張相係原色未有加工)。




講咁耐俾大家睇下動感少爺先啦~



(Audio: Happier - A Fine Frenzy)

 

第一次編輯麻麻地啦~
可以記低少爺游水時既開心樣返嚟睇返好有趣，
以後出遊又多一樣野要帶啦...XD

仲有幾段游水片段留返下篇夏令營再share~~